Кіраўнік НАУ Павел Латушка пракаментаваў «Белсату» заяву старшыні беларускага Чырвонага Крыжа Дзмітрыя Шаўцова, які фактычна прызнаў датычнасць да вывазу дзяцей з акупаваных тэрыторыяў Украіны. Латушка адзначыў, што калі з’явяцца доказы, іх перададуць Міжнароднаму крымінальнаму суду ў Гаазе.
«Мяне да глыбіні душы абурыў той факт, што людзі думаюць у меру сваіх думак запалёных, ці яны лічаць, што так лагічна рабіць, калі абвінавацілі Беларусь у тым, што мы выкрадаем дзяцей, якія прыязджаюць да нас на аздараўленне. І шчыра кажучы, справа ў тым, што і Беларускі Чырвоны Крыж прымаў у гэтым – і прымае, і будзе прымаць у гэтым – актыўны ўдзел», – прызнаўся генеральны сакратар беларускага Чырвонага Крыжа Дзмітрый Шаўцоў у эфіры дзяржаўнага тэлеканалу.
Кіраўнік Народнага антыкрызіснага ўпраўлення Павел Латушка, які збірае доказы датычнасці беларускай дзяржавы да дэпартацыі ўкраінскіх дзяцей, у каментары «Белсату» адзначыў, што беларускі Чырвоны Крыж парушае прынцыпы міжнароднай арганізацыі: непрадузятасць і нейтральнасць.
«Мы таксама можам упэўнена казаць пра тое, што цяперашняе становішча Чырвонага Крыжа ў Беларусі відавочна не адпавядае прынцыпу незалежнасці нацыянальнага таварыства ад дзяржаўнай палітыкі, палітыкі рэжыму Лукашэнкі», – сказаў Латушка.
Ён запэўніў, што НАУ фіксуе ўсе заявы і дзеянні беларускага Чырвонага Крыжа: «Мы ўважліва сочым за выказваннямі Шаўцова, але самае важнае – за дзеяннямі самой арганізацыі. Нашыя юрысты даюць прававую ацэнку кожнаму факту».
Кіраўнік Народнага антыкрызіснага ўпраўлення адзначыў, што словы аднаго толькі Шаўцова – не падстава для звароту ў гаагскі трыбунал: факты мусяць быць пацверджаныя з некалькіх крыніцаў.
«У сваёй ацэнцы мы не можам грунтавацца выключна на заявах прадстаўніка беларускага Чырвонага Крыжа, якія таксама могуць быць наўмыснай спробай, так бы мовіць, «замазаць» у гісторыі з ваеннымі злачынствамі найбуйнейшую міжнародную гуманітарную арганізацыю ў свеце і такім чынам панізіць фокус увагі да Лукашэнкі», – заявіў спадар Павел.
Ён не выключыў, што беларускае таварыства насамрэч толькі раздае гуманітарную дапамогу дзецям – гэта акурат адпавядае мэтам арганізацыі, і ніяк не ўдзельнічае непасрэдна ў дэпартацыі.
«Аднак кіраўнік беларускага Чырвонага Крыжа паднёс гэтую дзейнасць як уцягванне арганізацыі ў вываз дзяцей, што курыруе фонд Талая. І гэта ўжо патэнцыйна можа кваліфікавацца як суўдзел у ваенных злачынствах», – падкрэсліў палітык.
Ён заклікаў перадаваць у НАУ інфармацыю аб дзейнасці беларускага таварыства міжнароднай арганізацыі.
«Мы былі б удзячныя журналістам за пытанні гэтай асобе пра ўдзел менавіта ў вывазе дзяцей. Мы таксама былі б удзячныя беларусам, якія валодаюць якой-небудзь інфармацыяй пра гэта. У выпадку з’яўлення фактаў мы неадкладна перадамо інфармацыю ў суд у Гаазе», – падсумаваў Павел Латушка.
Днямі генеральны сакратар беларускага Чырвонага Крыжа Дзмітрый Шаўцоў у форме з нарукаўнай нашыўкаю з літарай Z – сімвалам расейскай агрэсіі ва Украіне – даў інтэрв’ю расейскім прапагандыстам у Данбасе. Ён адмовіўся даваць тлумачэнні.
Раней Павел Латушка перадаў Міжнароднаму крымінальнаму суду ў Гаазе дакументы аб датычнасці некалькіх асобаў на чале з Лукашэнкам да вывазу дзяцей з акупаваных тэрыторыяў Украіны. Менавіта за гэта суд выдаў ордар на арышт прэзідэнта Расеі Уладзіміра Пуціна і дзіцячага омбудсмана Марыі Львовай-Беловай.
У Менску адмаўляюцца лічыць свае дзеянні злачынствам, сцвярджаюць, што вывозяць дзяцей на аздараўленне.
Сяргей Крот belsat.eu