Прэзідэнт Украіны Уладзімір Зяленскі заявіў, што расейскія войскі распачалі бітву за Данбас. Пра маштабны расейскі наступ на гэтым кірунку ўжо некалькі тыдняў папярэджвалі заходнія і ўкраінская выведкі.
«Цяпер можна канстатаваць, што расейскія войскі пачалі бітву за Данбас, да якой даўно рыхтаваліся. Вельмі значная частка ўсяго расейскага войска цяпер сканцэнтраваная для гэтага наступу. Колькі б туды ні зганялі расейскіх вайскоўцаў, мы будзем змагацца. Мы будзем бараніцца. Мы будзем гэта рабіць кожны дзень. Нічога ўкраінскага не аддамо, а чужога – нам проста не трэба», – падкрэсліў прэзідэнт Украіны.
Пра новую фазу вайны заявілі ў Генштабе ЗСУ і Радзе нацыянальнай бяспекі і абароны.
Раніцай 19 красавіка Генеральны штаб ЗСУ паведаміў, што расейская армія «спрабуе працягваць наступальныя дзеянні ва Усходняй аперацыйнай зоне з мэтай устанаўлення поўнага кантролю над тэрыторыяй Данецкай і Луганскай вобласцяў, а таксама ўтрымання сухапутнага калідору з часова акупаваным Крымам».
Паведамляецца пра атакі на ізюмскім, данецкім і таўрычным кірунках. На паўднёвабужскім кірунку расейцы імкнуцца выйсці ў адміністратыўныя межы Херсонскай вобласці.
«Асноўныя намаганні суперніка сканцэнтраваныя на прарыве абароны нашых войскаў у Луганскай і Данецкай вобласцях, а таксама ўстанаўленні поўнага кантролю над горадам Марыупаль», – падкрэсліваецца ў ранішняй зводцы Генштабу.
На фоне пачатку расейскага наступу стала вядома, што прэзідэнт ЗША Джо Байдэн плануе абмеркаваць з лідарамі краінаў – супольнікаў і партнёраў ЗША захады, накіраваныя на падтрыманне Украіны і супрацьдзеянне ўварванню Расеі, паведамляе golosameriki.com.
- У канцы сакавіка расейскія войскі адступілі на чарнігаўскім і кіеўскім напрамках, асноўны сілы пачалі канцэнтравацца на ўсходзе і поўдні Украіны для правядзення генеральнага наступу на Данбас. Украінскія ўлады прагназавалі, што бітва за Данбас будзе нагадваць сваімі маштабамі Другую сусветную вайну.
РР belsat.eu
