Медыі паведамілі пра гібель у ЗША 42-гадовага беларускага хакеіста Канстанціна Кальцова
Канстанцін Кальцоў загінуў у Маямі, піша расейскае выданне «StarHit». Абставіны, пры якіх гэта здарылася, не ўдакладняюцца. Смерць спартоўца пацвердзіла Беларуская федэрацыя хакею і клуб «Салават Юлаеў», дзе ён працаваў трэнерам.
Пра гібель у ЗША хакеіста Канстанціна Кальцова першым паведаміла «Зеркало» са спасылкаю на дзве крыніцы. Выданне «StarHit» удакладняе, што гэта здарылася ў Маямі, дзе жыве тэнісістка Арына Сабаленка, з якой Кальцоў меў стасункі.
Беларуская федэрацыя хакею паведаміла, што спартовец «раптоўна памёр на 43-м годзе жыцця», і выказала спачуванні родным і блізкім.
Уфімскі клуб «Салават Юлаеў», дзе Кальцоў з 2021 года працаваў трэнерам, таксама не раскрыў падрабязнасцяў:
«З глыбокім смуткам паведамляем, што пайшоў з жыцця трэнер «Салавата Юлаева» Канстанцін Кальцоў. Ён быў моцны і жыццярадасны чалавек, яго любілі і паважалі гульцы, калегі, заўзятары. Канстанцін Яўгенавіч назаўжды ўпісаў сябе ў гісторыю нашага клубу».
Кальцоў пачаў кар’еру ў 1998 годзе ў менскай камандзе «Юнацтва». Выступаў за розныя беларускія і расейскія клубы, некалькі гадоў гуляў у НХЛ у «Pittsburgh Penguins».
У складзе нацыянальнай зборнай Беларусі быў з 1999 года, браў удзел у Алімпіядах у Солт-Лэйк-Сіці і Ванкувэры, а таксама ў 11 чэмпіянатах свету.
Трэнерскую кар’еру пачаў у 2017 годзе, з 2021 года – у «Салавату Юлаеву». На мінулым тыдні з’явілася неафіцыйная інфармацыя, што Кальцоў не будзе працягваць кантракту з клубам, замест гэтага зойме пасаду галоўнага трэнера менскага «Дынама» і беларускай зборнай.
Сцяпан Кубік belsat.eu
