18 сакавіка амбасадар Францыі ў Беларусі Нікаля дэ Лякост сустрэўся з пастарам менскай царквы «Новае жыццё» Вячаславам Ганчарэнкам.
Прыём доўжыўся каля гадзіны. Падчас размовы амбасадар выказаў цікавасць да царквы, якую пазбавілі будынку. Яго здзівіла, што вернікаў пакінулі без памяшкання і нічога не прапанавалі ўзамен, паведамляе сайт царквы.
У сваю чаргу пастар Вячаслаў Ганчарэнка распавёў гісторыю будынку царквы, расказаў пра дзейнасць супольнасці.
«Сустрэча прайшла ў вельмі добрай, сяброўскай атмасферы, – адзначыў адміністратар царквы Віталь Антончыкаў. – Адчувалася, што спадар пасол шчыра цікавіцца нашаю сітуацыяй і праяўляе свой удзел».
4 сакавіка прадстаўнікі царквы сустрэліся з павераным у справах ЗША ў Беларусі Джэфры Джукам.
17 лютага сілавікі выселілі пратэстанцкую царкву «Новае жыццё», што ў менскім мікрараёне Сухарава.
Тым не менш, вернікі штонядзелю працягваюць збірацца на малітву каля сваёй царквы.
МГ belsat.eu
