Законапраект па барацьбе з «ненармальнымі адносінамі» на ўзгадненні – генпракурор
У Беларусі плануецца ўвесці адміністратыўную адказнасць за прапаганду «ненармальных адносінаў». Законапраект на стадыі ўзгадненні, распавёў генпракурор Андрэй Швед 19 лютага. Таксама ён падзяліўся звесткамі пра нізкі ўзровень злачыннасці.
«З ініцыятывы органаў пракуратуры падрыхтаваны законапраект, які прадугледжвае адміністратыўную адказнасць за прапаганду ненармальных адносінаў, педафіліі, добраахвотнай адмовы ад дзяцей», – кажа Швед.
На ягоную думку, трэба «не дапускаць падобнага роду нават абмеркавання якіх-небудзь тэмаў».
Швед таксама распавёў, што ў 2023 годзе колькасць зарэгістраваных злачынстваў скарацілася на 3,6 %.
«Узровень злачыннасці з’яўляецца мінімальным за апошнія пяць гадоў», – адзначае ён.
Генпракупор не мог абмінуць «экстрэмістаў». Паводле ягоных звестак, у 2023 годзе нібыта за экстрэмізм каралі ў два разы менш. Але ў суд накіравалі больш за тысячу крымінальных справаў паводле «экстрэмісцкіх» артыкулаў.
«Пракурорамі падтрыманае дзяржаўнае абвінавачванне ў крымінальных справах дадзенай катэгорыі ў дачыненні да паўтары тысячы асобаў. Апраўдальныя прысуды судом не выносіліся», – паведаміў Швед.
Зарэгістраваных забойстваў стала на 10,4 % менш, а цяжкіх злачынстваў – на 11,9 %. Зніжэнне другога паказніка Швед тлумачыць зніжэннем збыту наркотыкаў на 11,9 %.
«Органы ўнутраных справаў арыентаваныя ў першую чаргу на выяўленне і спыненне дзейнасці буйных збытчыкаў. У выніку колькасць канфіскаваных наркатычных сродкаў, псіхатропных рэчываў узрасла ў 4,5 разы», – сказаў ён.
А цяжкіх злачынстваў стала на 16 % больш, у асноўным за кошт махлярстваў, распавёў Швед.
Паводле звестак «BELPOL», у 2023 годзе было распачата больш за 85,3 тысячаў крымінальных справаў (88,6 тысячаў у 2022 годзе). Чвэрць з іх – за крадзеж. Паводле артыкулу «Забойства» зарэгістравана 223 злачынствы, у выніку якіх загінула 673 асобы. У 2022 годзе такіх злачынстваў было 255.
Арсен Рудэнка belsat.eu
