Нацыянальная авіякампанія Аб’яднаных Арабскіх Эміратаў «Etihad Airways» скасавала супрацу з «Белавіяй», піша motolko.help. Гаворка ідзе пра гэтак званы код-шэрынг – дамоўленасці паміж перавознікамі аб супольнай эксплуатацыі аднаго рэйсу.
Кампанія «Etihad Airways» скасавала супрацу мінімальна ў адным кірунку: Менск – Абу-Дабі. Ужо цяпер на сайце авіякампаніі нельга набыць квіток на рэйс паміж дзвюма сталіцамі. «Etihad Airways» і «Белавія» супрацоўнічалі 10 гадоў.
Паводле звестак motolko.help, у выніку гэтага рашэння пасажыры пачалі атрымліваць паведамленні пра тое, што стыковачны рэйс з Менску або ў Менск адменены і трэба шукаць іншыя варыянты палёту.
Код-шэрынг – дамоўленасці паміж перавознікамі аб супольнай эксплуатацыі аднаго рэйсу. У такіх выпадках, нават калі пасажыра перавозяць некалькі авіякампаніяў, гэта лічыцца адным рэйсам з адным квітком.
Раней «Белавія» мела такія пагадненні з 11 авіякампаніямі. Цяпер у некаторых з іх Менску няма наогул у спісе пунктаў прызначэння, а некаторыя паказваюць, што білетаў у беларускую сталіцу няма.
9 жніўня «Белавія» трапіла пад амерыканскія санкцыі. Яшчэ раней, пасля прымусовай пасадкі ў Менску самалёта «Ryanair», беларускай авіякампаніі забаранілі палёты над краінамі ЕЗ.
10 жніўня паведамлялася, што ў звязку з санкцыямі ЗША рэйсы «Белавіі» можа забараніць Грузія.
Сяргей Крот belsat.eu
