Зачыненыя памежныя пераходы «Шумскас – Лоша» і «Твярачус – Відзы». Літоўскія ўлады паведамлялі раней пра намер зачыніць іх.
17 жніўня а 23:56 на памежным пераходзе «Шумскас – Лоша» супрацоўнікі літоўскай мяжы выставілі знак забароны праезду, напісаў канал «Мотолько Помоги».
З апоўначы 18 жніўня пераходы «Шумскас – Лоша» і «Твярачус – Відзы» былі зачыненыя.
Трапіць на тэрыторыю Літвы цяпер можна толькі праз чатыры памежныя пункты: «Каменны Лог – Мядзінінкай», «Прывалка – Райгардас», «Беняконі – Шальчынінкай» і «Катлоўка – Лаворышкес».
Нагадаем, што Літва зачыніла два з шасці пунктаў пропуску на мяжы з Беларуссю ў адказ на размяшчэнне баевікоў ПВК Вагнэра ў нашай краіне. І гэта можа быць яшчэ далёка не апошні крок.
Літоўскія ўлады разглядаюць магчымасць далейшага закрыцця мяжы ў адказ на пагрозы ад рэжыму Аляксандра Лукашэнкі. Гаворка пра супольнае рашэнне з суседнімі краінамі, што мяжуюць з Беларуссю.
Гэтак, на дзень 28 жніўня ў Варшаве запланавалі сустрэчу з удзелам міністраў краінаў Балтыі і Польшчы, у якой будуць разглядацца пытанні сінхранізацыі дзеянняў для закрыцця мяжы з нашай краінай у выпадку з’яўлення новых пагрозаў з тэрыторыі Беларусі.
Раман Шавель belsat.eu