У пункт пропуску «Брэст» 17 жніўня ў бязвізавым парадку прыбыў грамадзянін Польшчы і пры праходжанні пагранічнага кантролю ён звярнуўся да беларускіх пагранічнікаў па прадастаўленне статусу бежанца. Пра гэты выпадак распавялі ў Дзяржпагранкамітэце.
Па словах мужчыны, рашэнне звярнуцца па абарону ў Беларусі, нібыта прынятае з-за «асцярог за ўласнае жыццё і здароўе».
«Грамадзяніна Польшчы прапусцілі праз мяжу і рэкамендавалі звярнуцца ў органы МУС за атрыманнем адпаведнага статусу», – сказана ў паведамленні Дзяржпагранкамітэту. Імя паляка і яго дадзеныя – не паведамляюцца.
Гэта ўжо трэці падобны выпадак за апошні час, калі грамадзянін Польшчы звярнуўся па прадастаўленне статусу бежанца ў Беларусі. Так, у снежні 2021 года на мяжы з Беларуссю польскі вайсковец Эміль Чачка, які збег са сваёй службы ў арміі і папрасіў прытулку. У Польшчы на яго распачалі крымінальную справу за дэзерцірства. Таксама паведамлялася, што на радзіме ў яго праблемы з законам і яму пагражаў суд.
Пазней ён даваў інтэрв’ю беларускім прапагандыстам, у якіх расказваў пра нібыта забойствы мігрантаў на баку Польшчы і што сам прымаў у гэтым удзел. У сакавіку 2022 года стала вядома, што Чачко быў знойдзены ў Менску павешаным. Яго пахавалі ў Беларусі.
У чэрвені ў Беларусь прыехаў паляк Марцін Міколаек і даў інтэрвʼю, у якім абвінаваціў Польшчу ў русафобіі і ганеннях на свабоду слова. Ён таксама папрасіў у Беларусі палітычны прытулак. Пазней высветлілася, што польскія ўлады абвінавачваюць яго ў прапагандзе вайны.
Алена Рувіна belsat.eu
