Наступствы авіяўдару па Львове раніцаю 18 красавіка. Адна з расейскіх ракетаў патрапіла ў станцыю тэхнічнага абслугоўвання. У выніку ракетнага абстрэлу загінулі 7 чалавек, 4 з якіх – працаўнікі СТА, мінімум 11 пацярпелі, у тым ліку адно дзіця. Астатнія ўдары былі здзейсненыя па аб’ектах вайсковай інфраструктуры.
«Белсат» пагутарыў з чалавекам, які ў момант паветранай атакі быў недалёка ад месцаў выбухаў.
Марта прыехала на выходныя да сяброў і планавала вярнуцца дадому. Дзяўчына хацела зняць грошы ў банкамаце, калі пачалася трывога:
«Я планавала з’ехаць і пайшла грошы зняць у банкамаце каля вакзалу. Там я пачула першы выбух. Сказалі, што трэба спусціцца ў падземны пераход, і я пайшла разам з усімі. У пераходзе я пачула 3 моцныя выбухі. Я нічога, безумоўна, не бачыла, але чула, быццам гэта ўсё адбывалася вельмі блізка ад нас. Выбухі былі вельмі магутныя».
Дзяўчына кажа, што людзей ахапіла паніка. Дзякуючы працы медыкаў і валанцёраў, якія дапамагалі, удалося суняць эмацыйную хвалю. Медыкі прапаноўвалі ваду і дыхальныя практыкаванні і практыкаванні, каб зняць стрэс. Людзям давялося даволі доўгі час правесці ў пераходзе.
«Калі быў адбой, мы выйшлі на паверхню – убачылі, што далей за вакзал уздымаюцца клубы дыму, было відаць, што нешта гарыць і выбухала», – сказала Марта.
Сітуацыя ў Львове цяпер спакойная. Адбылася яшчэ адна паветраная трывога, але ў горадзе выбухаў не было чуваць.