18 красавіка ў Міністэрства замежных справаў Расеі быў выкліканы амбасадар Чэхіі ў РФ Віцязслаў Півонька. Пра гэта паведамляе МЗС суседняй краіны.
Амбасадару паведамілі, што 20 супрацоўнікаў амбасады Чэхіі ў Маскве абвяшчаюцца персонамі «non grata». Ім загадана да канца дня 19 красавіка пакінуць тэрыторыю Расеі.
Ад Чэхіі таксама патрабуюць прывесці колькасць прынятых на месцы працаўнікоў дыпмісіі ў Маскве да парытэту з колькасцю аналагічных працаўнікоў амбасады Расеі ў Чэхіі.
Напярэдадні міністр замежных спраў Чэхіі Ян Гамачак заявіў, што краіна вышле 18 расейскіх дыпламатаў. Таксама паліцыя Чэхіі абвясціла ў вышук меркаваных супрацоўнікаў ГВУ Аляксандра Пятрова і Руслана Башырава. Міністр паведамляе, што ў Чэхіі «ёсць абгрунтаваныя падазрэнні» у датычнасці расейскіх спецслужбаў да выбухаў складоў боепрыпасаў у Врбеціц у 2014 годзе. Краіна вырашыла выслаць тых, каго ідэнтыфікавалі як супрацоўнікаў расейскіх спецслужбаў Галоўнага выведвальнага ўпраўлення і Службы вонкавай выведкі Расеі.
Афіцыйная прадстаўніца МЗС Расеі Марыя Захарава заявіла, што Захад нібыта хацеў такім чынам «перакрыць» інфармацыю аб падрыхтоўцы ў Беларусі дзяржаўнага перавароту.
МГ belsat.eu
