Стала вядома, калі адбудзецца першае паседжанне Усебеларускага народнага сходу ў канстытуцыйным статусе
Першае паседжанне VII Усебеларускага народнага сходу адбудзецца 24 – 25 красавіка, паведаміў прэм’ер-міністр Беларусі, старшыня Рэспубліканскага арганізацыйнага камітэту па падрыхтоўцы і правядзенні першага паседжання VII УНС Раман Галоўчанка.
«У першы дзень пераважна будуць разглядацца пытанні арганізацыйна-выбарчыя, таму што гэтае паседжанне асаблівае. Трэба будзе рэалізаваць шэраг працэдураў, наўпрост прадугледжаных законам: выбраць працоўныя органы, падліковую камісію, старшыню УНС, намесніка старшыні, прэзідыум УНС – пастаянна дзеючы працоўны орган, прыняць часовы рэгламент працы Усебеларускага народнага сходу. У другі дзень будуць разглядацца пытанні, уключаныя ў парадак дня», – распавёў кіраўнік ураду.
Па словах Рамана Галоўчанкі, падрыхтоўка да паседжання ідзе ў планавым рэжыме. Чыноўнік адзначыў, што Лукашэнка даручыў зрабіць гэтае мерапрыемства «асабліва ўрачыстым, значным, запамінальным», паколькі паседжанне Усебеларускі народны сход упершыню правядзе ў канстытуцыйным статусе.
«Усе нашыя прапановы былі ў асноўным прынятыя, таму мы цяпер будзем працягваць падрыхтоўку ў адпаведнасці з тымі рашэннямі, якія мы намецілі, выпрацавалі і ўзгаднілі», – сказаў прэм’ер-міністр.
Таксама падрыхтаваны праект парадку дня першага пасяджэння VII Усебеларускага народнага сходу. Чакаецца, што дэлегаты, напрыклад, разгледзяць новую Канцэпцыю нацыянальнай бяспекі і Ваенную дактрыну Беларусі.
У складзе Усебеларускага народнага сходу – 1200 чалавек. Больш за траціну ўдзельнікаў аўтаматычна складаюць дэпутаты Палаты прадстаўнікоў, чальцы Савету Рэспублікі, прадстаўнікі выканаўчай і судовай улады. А таксама ўсе чальцы Менскага гарадскога савету дэпутатаў. Яшчэ па траціне дэлегатаў – ад мясцовых саветаў і ад суб’ектаў грамадзянскай супольнасці – будуць абраныя гэтымі структурамі.
Усебеларускі народны сход як канстытуцыйны орган улады мае ўносіць прапановы ў зменах у Канстытуцыю, развязваць пытанні легітымнасці выбараў, прымаць рашэнні пра змяшчэнне прэзідэнта ці ўвядзенне ваеннага становішча, прызначаць суддзяў Канстытуцыйнага і Вярхоўнага судоў.
Да канца сакавіка працягнецца вылучэнне кандыдатаў на Усебеларускі народны сход. Да 10-га красавіка мясцовыя саветы дэпутатаў і субʼекты грамадзянскай супольнасці маюць зацвердзіць канчатковыя спісы дэлегатаў.
Марыя Міхалевіч belsat.eu
