19 лютага ў судзе Маскоўскага раёну Менску распачаўся суд над журналісткаю TUT.by Кацярынаю Барысевіч і доктарам БХМД Арцёмам Сарокіным. Журналістку і доктара вінавацяць паводле ч. 3 арт. 178 КК («Раскрыццё медычнай таямніцы»). Артыкул прадугледжвае да трох гадоў пазбаўлення волі.
Кацярыну Барысевіч і Арцёма Сарокіна затрымалі 19 лістапада ў сувязі з крымінальнаю справай аб нібыта раскрыцці медычнай таямніцы збітага да смерці Рамана Бандарэнкі (ч. 3 арт. 178 КК).
Падставаю для крымінальнай справы стала публікацыя журналісткі, у якой яна прывяла словы доктара пра адсутнасць у крыві Рамана алкаголю. Доктар таксама перадаў журналістцы вынікі аналізу. Але ўлады сцвярджаюць, што Раман Бандарэнка быў п’яны. Публікаванне ж вынікаў даследавання, які зняпраўджваў гэтыя сведчанні, пракуратура назвала раскрыццём медычнай таямніцы.
Пры гэтым родныя забітага перадалі журналістам пасведчанне пра адсутнасць у крыві Рамана алкаголю і адзначылі, што даюць згоду на такую публікацыю і гэта не ёсць медычнаю таямніцай.
Праваабаронцы пазвалі Кацярыну Барысевіч і Арцёма Сарокіна палітычнымі вязнямі.
- Рамана Бандарэнку збілі невядомыя на плошчы Пераменаў 11 лістапада.
- 12 лістапада Раман памёр у шпіталі.
- Да збівання, магчыма, мелі дачыненне старшыня Федэрацыі хакею Дзмітрый Баскаў і кікбаксёр Дзмітрый Шакута.
- Смерць Рамана Бандарэнкі, які проста выйшаў у свой двор і загінуў, выклікала вялікую хвалю салідарнасці сярод беларусаў.
- Лукашэнку абурылі народныя мемарыялы загінулым ад гвалту сілавікоў: «Навошта ў Менску ствараць мемарыялы пад выглядам могілак? Могілкі і мемарыялы – гэта псіхалагічнае ўздзеянне на насельніцтва».
СК belsat.eu
