Рэспубліканцы забяспечылі сабе 218 месцаў, неабходных для большасці ў ніжняй палаце амерыканскага парламенту. Цяпер яны змогуць блакаваць ініцыятывы адміністрацыі дэмакрата Джо Байдэна наступныя два гады, піша «Бі-Бі-Сі».
Рэспубліканская партыя здолела ўзяць большасць у Палаце прадстаўнікоў Кангрэсу ЗША. Яе прадстаўнікі забяспечылі сабе 218 месцаў з 435.
Як адзначае брытанская тэлерадыёкарпарацыя «Бі-Бі-Сі», цяпер рэспубліканцы змогуць блакаваць ініцыятывы прэзідэнта-дэмакрата Джо Байдэна, а таксама ўзначаліць ключавыя камітэты, што дасць ім магчымасць прасоўваць патрэбныя законапраекты і распачынаць даўно запланаваныя імі расследаванні дзейнасці самога Байдэна, ягонай сям’і і працаўнікоў ягонай адміністрацыі.
Пасаду спікера Палаты прадстаўнікоў зойме найхутчэй Кевін МакКарці, якога сябры Рэспубліканскай партыі напярэдадні абралі як патэнцыйнага пераемніка дэмакраткі Нэнсі Пэлоўсі.
У той жа час любыя заканадаўчыя ініцыятывы або расследаванні, ухваленыя рэспубліканцамі ў ніжняй палаце, могуць быць заблакаваныя ў Сенаце, дзе дэмакраты ўсё яшчэ захоўваюць большасць.
Прэзідэнт Байдэн павіншаваў рэспубліканцаў з перамогаю, прапанаваўшы супрацу дзеля дасягнення вынікаў на карысць усіх амерыканцаў.
Першае пасяджэнне новага складу Кангрэсу адбудзецца 3 студзеня 2023 года.
Поспех рэспубліканцаў у Палаце прадстаўнікоў адбыўся на фоне заявы Доналда Трампа пра ягоны ўдзел у барацьбе за прэзідэнцкую пасаду на выбарах 2024 года.
Сяргей Крот belsat.eu