Сілавікі затрымалі ў Менску 29-гадовую дзяўчыну за ўдзел у пратэстах, з ёй з’явілася «пакаяннае» відэа. Нагодай сталі яе фатаграфіі ў сацыяльнай сетцы для знаёмстваў Tinder. На здымку, які выклала дзяўчына ў сетцы, яна падчас аднаго з пратэсных маршаў 2020 года стаіць на дарозе з бел-чырвона-белым сцягам.
Мянчанку змясцілі ў ІЧУ і распачалі супраць яе крымінальную справу паводле арт. 342 КК («Актыўны ўдзел у групавых дзеяннях, якія груба парушаюць грамадскі парадак»).
Дзяўчына працуе менеджаркай у лагістычнай кампаніі «Trans Solutions». Сілавікі заяўляюць, быццам яе фота ў міліцыю «зліў» хтосьці з карыстальнікаў Tinder.
Таксама ў праўладным тэлеграм-канале заявілі, што пасля затрымання мянчанкі дзве яе сяброўкі, з якімі яна хадзіла на маршы, паспрабавалі з’ехаць з Беларусі. Адной удалося выехаць у Турцыю, але другую 29-гадовую дзяўчыну затрымалі на мяжы з Польшчай, яна працуе адміністрацыйным памочнікам у міжнароднай арганізацыі.
Алена Рувіна belsat.eu