У Еўразвязе заявілі аб магчымай рызыцы пагаршэння сітуацыі з мігрантамі на мяжы Беларусі
Выканаўчы дырэктар Еўрапейскага агенцтва па пытаннях прадастаўлення прытулку (EASO) Ніна Грэгары папярэджвае пра пагрозу пагаршэння сітуацыі з мігрантамі на мяжы Беларусі, паведамляе ТАСС са спасылкай на інтэрв’ю нямецкай медыягрупы «Funke».
Прадстаўніца EASO лічыць, што сітуацыя ў краінах на мяжы з Беларуссю вельмі сур’ёзная і яе дакладна не вырашыць у бліжэйшай будучыні
Таксама Ніна Грэгары адзначыла, што ў значнай ступені ад крызісу з мігрантамі пацярпелі Латвія і Літва.
«Толькі адзін прыклад: Літва ў год звычайна рэгіструе 500 запытаў на прадастаўленне прытулку. Зараз улады зарэгістравалі больш за 2,5 тысяч заяў ад бежанцаў, якія прыбылі з Беларусі, з пачатку наплыву мігрантаў у пачатку лета», – паведаміла Грэгары.
Паводле яе слоў, для аказання дапамогі з прыёмам, рэгістрацыяй і правядзеннем працэдуры разгляду запытаў мігрантаў EASO накіравала ў Літву 77 супрацоўнікаў.
«Funke» паведамляе, што з пачатку жніўня федэральная паліцыя Нямеччыны зарэгістравала звыш 4,3 тысячы мігрантаў з такіх краін, як Ірак, Сірыя і Іран, якія незаконна прыбылі праз тэрыторыю Беларусі і Польшчы.
АД, belsat.eu
