Прадстаўнік «ByPol» пра тэрытарыяльную абарону: Відавочна, што Лукашэнка збіраецца ваяваць толькі з уласным народам
Войскі тэрытарыяльнай абароны павінны быць гатовыя хутка мабілізавацца і могуць быць выкарыстаныя супраць беларускіх грамадзян, заявіў у Шклоўскім райвыканкаме Аляксандр Лукашэнка.
Лукашэнка выступаў 16 чэрвеня ў Шклове на сустрэчы па пытаннях тэрытарыяльнай абароны з удзелам міністра абароны, сакратара Рады Бяспекі і прадстаўнікоў рэгіянальных уладаў.
«За мінулы год мы на сабе адчулі, як дэструктыўнае інфармацыйнае ўздзеянне, эканамічны, палітычны націск, якія ішлі з Захаду, уплывалі на светапогляд нашых людзей і штурхалі некаторых з іх фактычна на здрадніцтва ўласнаму народу. Заўсёды неабходна даваць адпор такім дзеячам, каб у памяці ворага ён застаўся на многія гады. І на гэта здольная толькі ўсенародная абарона, калі мы ўсе будзем абараняць сваю зямлю», – сказаў ён.
Што такое тэрытарыяльныя войскі зараз і што стаіць за размовамі Лукашэнкі пра «усенародную абарону»? Каментары «Белсату» даў прадстаўнік «ByPol», былы начальнік аддзелу 3-га упраўлення ГУБАЗiК падпалкоўнік міліцыі Аляксандр Азараў.
– Што зараз уяўляюць з сябе тэрытарыяльныя войскі Беларусі? Якія іх афіцыйныя задачы?
– Тэрытарыяльныя войскі – гэта падраздзяленні, якія фармуюцца ў ваенны час ці падчас ваеннай пагрозы і абвяшчэння мабілізацыі з ваеннаабавязаных запасу. Асноўныя задачы – ахова і абарона аб’ектаў, барацьба з дыверсійна-разведвальнымі групамі і незаконнымі ўзброенымі фармаваннямі, падтрыманне рэжыму ваеннага стану.
– Наколькі гэта баяздольная структура?
– Пры поўным укамплектаванні гэта дастаткова сурʼёзная структура, якая павялічвае абароназдольнасць дзяржавы. Падобныя войскі ствараюць многія вядучыя краіны свету. Ваеннаабавязаныя прызываюцца пераважна з таго ж рэгіёну, дзе будуць праходзіць службу, яны лепш ведаюць адзін аднаго і добра арыентуюцца на мясцовасці. Аднак рэальная карціна зусім не прывабная для рэжыму.
– Лукашэнка заявіў пра выкарыстанне «усенароднай абароны» супраць сваіх унутраных ворагаў. Ці мае існуючая тэрытарыяльная абарона нешта агульнае з «усенароднасцю»?
– Да падзеяў восені 2020 года на зборы сярэдні раён мог паклікаць 20-50 чалавек, выкарыстоўваючы пры гэтым абсалютна ўсе свае рэсурсы (і ўгаворвалі, і прасілі, і пагражалі). Зараз нават гэтых паказнікаў рэжыму не атрымаецца дасягнуць. Колькасць тых, хто запісаўся ў мабілізацыйны план «Перамога» ўжо зараз значна перавышае лічбы, якія дэманструюць раённыя ваенныя камісарыяты, пры гэтым людзі ўсё дадаюцца і робяць гэта добраахвотна.
Таму казаць пра ўсенародную тэрытарыяльную абарону на баку Лукашэнкі не выходзіць. Пры гэтым звяртаю ўвагу, што наш план прадугледжвае, у тым ліку, падтрымку суверэнітэту і незалежнасці, а таксама абарону ад знешняй агрэсіі ў цяжкі для Беларусі час. Адначасова відавочна, што Лукашэнка збіраецца ваяваць толькі з уласным народам.
– «Нам самім на месцах – старшыням райвыканкамаў і аблвыканкамаў – трэба навучыцца ваяваць», – сказаў Лукашэнка. Для чаго цывільных чыноўнікаў прызначаюць кіраваць ваеннай структурай?
– Чыноўнікі – гэта вертыкаль, на якую ён абапіраецца. Каб дыверсіфікаваць сваю асабістую бяспеку, ён пераразмяркоўвае ўладныя паўнамоцтвы паміж дзяржаўнымі структурамі. Адным словам, Лукашэнка не давярае войску.
– Ці мае сэнс тэрытарыяльная абарона Беларусі ў сучасным выглядзе для абароны незалежнасці?
– Сэнсу ў тэрытарыяльнай абароне пры Лукашэнку няма ніякага. Больш за тое, калі ён пакліча такую колькасць цывільных і ўзброіць іх, гэта згуляе супраць яго. Улада ведае свой рэальны рэйтынг і не пойдзе на такое. Размовы пра мабілізацыю – толькі спроба паказаць сваю рашучасць да дзеянняў. Сапраўдная мабілізацыя каштуе вельмі дорага, такіх грошаў у бюджэце краіны няма.
РЛ, belsat.eu
