Суд у ЗША аштрафаваў Дональда Трампа на 355 мільёнаў долараў за фінансавае махлярства
Суд у Нью-Ёрку прызнаў былога прэзідэнта ЗША Дональда Трампа вінаватым у справе аб махлярстве і абавязаў яго выплаціць 354,9 мільёнаў долараў штрафу.
Згодна з пастановай суду, па 4 мільёны долараў павінны таксама выплаціць сыны палітыка Дональд Трамп-малодшы і Эрык Трамп. Акрамя таго, былому прэзідэнту на тры гады забаранілі працаваць у любых нью-ёркскіх кампаніях ці ўзначальваць іх.
Пазоў супраць Трампа падала пракуратура, якая сцвярджала, што палітык фальсіфікаваў фінансавую справаздачнасць, каб атрымаць ад банкаў больш выгадныя крэдыты. У прыватнасці, паводле пазову, экс-прэзідэнт завышаў уласнае багацце на 3,6 мільярдаў долараў у год на працягу дзесяці гадоў.
Суд таксама пастанавіў, што Трампу і ягоным кампаніям забаронена падаваць заяўкі на атрыманне крэдытаў у любой фінансавай установе, упаўнаважанай ці зарэгістраванай Дэпартаментам фінансавых паслугаў штату Нью-Ёрк. У той жа час суддзя не стаў адмяняць бізнес-ліцэнзію Трампа, што, паводле некаторых экспертаў, магло фактычна пакласці канец ягонай бізнес-імперыі.
Дональд Трамп не пагадзіўся з абвінавачваннем і заявіў, што гэты суд – «бясспрэчнае ўмяшальніцтва ў выбары».
Пракурор Леціша Джэймс, якая і высунула абвінавачванні ў адрас Трампа, назвала рашэнне суду «выбітнай перамогай для штату і ўсёй краіны».
Дональд Трамп быў 45 прэзідэнтам ЗША, займаў гэтую пасаду з 2017 па 2021 гады. Сёлета зноў мае намер вылучыць сваю кандыдатуру на прэзідэнцкіх выбарах, якія пройдуць 5 лістапада.
Марыя Міхалевіч belsat.eu
