15 кастрычніка на рэферэндуме, які праходзіў адначасова з выбарамі ў польскі парламент, палякі прагаласавалі супраць зносу сцяны.
На пытанне, вынесенае на рэферэндум – ці падтрымліваеце вы ліквідацыю бар’еру на мяжы Рэспублікі Польшча з Рэспублікаю Беларусь – 96,14 % палякаў адказалі «не». Але сам рэферэндум не адбыўся праз нізкую яўку.
Згодна з звесткамі на раніцу 16 кастрычніка, яўка склала ўсяго 44 % ад агульнай колькасці выбарнікаў. Згодна з польскім законам, вынікі рэферэндуму прызнаюцца пры яўцы 50 % і вышэй.
Пры гэтым яўка на ўласна выбары склала 73 %, гэта рэкорд у найноўшай гісторыі Польшчы. На папярэдніх парламенцкіх выбарах, у 2019 годзе яна была роўная 61,74 %.
Усяго на рэферэндум у Польшчы вынеслі чатыры пытанні: пра ліквідацыю агароджы на польска-беларускай мяжы; аб продажы дзяржаўных актываў замежным суб’ектам, які прывядзе да страты грамадзянамі Польшчы кантролю над стратэгічнымі сектарамі эканомікі; пра павышэнне пенсійнага веку; аб прыёме нелегальных мігрантаў з Блізкага Усходу і Афрыкі ў межах механізму прымусовага перасялення, навязанага еўрапейскаю бюракратыяй.
На астатнія пытанні больш за 90 % тых, хто ўзяў удзел у рэферэндуме, таксама адказалі «не».
Раман Шавель belsat.eu
