Мігранты на польскай мяжы распавялі, як іх абакралі беларускія сілавікі

DW зрабіў рэпартаж з беларуска-польскай мяжы, дзе ў цяжкіх умовах, без ежы і грошай, знаходзяцца мігранты з Блізкага Усходу.

Маладая жанчына Неда і яе муж Абузар перайшлі на польскую тэрыторыю дзесяць дзён таму – яны разлічвалі праз Польшчу трапіць у Нямеччыну. Але замест гэтага памежнікі Польшчы і Беларусі перанакіроўвалі іх то на адзін бок мяжы, то на іншы. Пару дзён таму Неду і Абузара чарговы раз выштурхнулі з тэрыторыі Беларусі.

«Беларускія паліцэйскія забралі ў нас грошы на куплю ежы і SIM-карткі, але так нічога нам і не прынеслі», – кажа Абузар. Затым, паводле ягоных словаў, сілавікі спустошылі іх кішэні і ноччу сілай адвезлі да польскай мяжы. З тых часоў пара застаецца пад дрэвам у памежнай зоне – ім больш няма куды ісці.

Неда распавяла журналістам, што ў гэтых цяжкіх умовах страціла сваё ненароджанае дзіця. «Тыдзень таму я страціла прытомнасць, страціла шмат крыві і ў выніку пазбавілася дзіцяці», – кажа яна.

Абузару і Недзе дапамаглі польскія валанцёры: яны прывезлі ім цёплыя рэчы і выклікалі памежнікаў, якія забралі мігрантаў.

Валанцёры кажуць, што ўцекачы часта не могуць нават купіць сабе ежу і вымушаны піць ваду з лужын у лесе.

Кожны мігрант плаціць рэжыму Лукашэнкі $ 2000–14 000 за спробу нелегальна трапіць у Еўропу

  • У 2021 годзе Літва, Польшча і Латвія фіксуюць выбуховы рост нелегальнай міграцыі з Беларусі. Краіны ЕЗ вінавацяць рэжым Лукашэнкі ў тым, што ён спрыяе нерэгулярнай міграцыі ў Еўропу і мэтанакіравана перакідвае мігрантаў з Блізкага Усходу да мяжы. Дзеянні афіцыйнага Менску на Захадзе называюць гібрыднаю вайною.

ІІ belsat.eu

Падпісвайся на telegram Белсату

Hавiны