Прысуд Сцяпану Латыпаву, чарговае сведчанне пра загад міліцыянтам збіваць людзей. Галоўнае за 16 жніўня
Belsat.eu падводзіць вынікі 16 жніўня – 373-га дня супрацьстаяння грамадства і ўладаў.
Прысуд Латыпаву
У судзе Савецкага раёну Менску днём 16 жніўня абвесцілі вырак палітвязню Сцяпану Латыпаву: 8,5 года ўкалоніі ўзмоцненага рэжыму і 8700 рублёў штрафу, піша «Вясна».
Пракурор Уладзімір Рабаў запытаў у суда менавіта такое пакаранне. Справу разглядаў суддзя Аляксандр Волк.
Латыпава назвалі вінаватым у стварэнні telegram-чату, майстэрні для вырабу пратэставай сімволікі, у супраціве міліцыянтам. Да таго ж прадпрымальніка вінавацяць ва ўвядзенні ў зман кліентаў падчас аказання паслуг хімічнай абароны раслінаў.
Сцяпан Латыпаў не прызнае віны ні ў адным з эпізодаў, якія яму інкрымінуюць. На судзе ён адмовіўся даваць паказанні, толькі расказаў пра катаванні за кратамі.
Сцяпана Латыпава затрымалі 15 верасня 2020 года ў двары, калі ён прасіў сілавікоў у масках прадставіцца. Удома ў яго правялі ператрус. Спачатку яго вінавацілі ў тым, што ён нібыта планаваў атруціць сілавікоў ядахімікатамі, якія набываў для знішчэння баршчэўніка. Аднак у выніку выставілі абвінавачанне ў арганізацыі дзеянняў, якія груба парушаюць грамадскі парадак, супраціве пры затрыманні і ў махлярстве ў асабліва буйным памеры.
На паседжанні 1 чэрвеня палітвязень заявіў пра пагрозы ягонаму бацьку і суседзям ды пра невыносныя катаванні: 51 дзень у так званай прэс-хаце – адмысловай камеры для катаванняў, дзе літаральна выбіваюць прызнальныя паказанні. Спецслужбы праслухоўвалі тэлефон Сцяпана Латыпава за тры месяцы да яго затрымання.
На знак пратэсту супраць катаванняў Латыпаў парэзаў сабе горла ў судзе, ён быў шпіталізаваны, яму зрабілі аперацыю. Але ўжо на наступны дзень яго вярнулі ў СІЗА № 1 на вуліцы Валадарскага.
Падпалкоўнік МУС Максімовіч летась у жніўні загадаў збіваць людзей
Яшчэ адзін запіс размовы міліцыянтаў па ўнутранай сувязі МУС апублікавалі «Кіберпартызаны». Хакеры сцвярджаюць, што атрымалі доступ да запісаў пасля ўзлому засакрэчаных сервераў Дэпартаменту забеспячэння аператыўна-вышуковай дзейнасці МУС.
У чарговым аўдыязапісе размовы чалавек з голасам, падобным да голасу палкоўніка Мікалая Максімовіча, які ёсць намеснікам начальніка міліцыі грамадскай бяспекі УУС Менаблвыканкаму, аддае загады іншаму кіраўніку РАУС, чыя асоба пакуль не ўсталяваная, жорстка збіваць і разганяць людзей з вуліцаў гораду. Раней група хакераў «Кіберпартызаны» апублікавала запіс размовы меркавана Максімовіча з кіраўніком АУС Салігорску Аляксандрам Шараварам.
АДКБ мусіць адрэагаваць на пагрозу з Афганістану
Арганізацыя дамовы аб калектыўнай бяспецы, у якую ўваходзяць Беларусь, Расея, Арменія, Казахстан, Кыргызстан і Таджыкістан, правядзе вучэнні на таджыкска-афганскай мяжы, нягледзячы на наступ тэрарыстаў «Талібана» ў Афганістане, расказаў БелТА старшыня АДКБ Станіслаў Зась.
Паводле Зася, хоць талібы і кантралююць большую частку Афганістана і яго межы, «неабходнасці ў задзейнічанні механізмаў АДКБ няма», бо Таджыкістан сваю мяжу кантралюе. Пры тым сітуацыя «выклікае занепакоенасць». Пра гэта яму паведаміў міністр абароны Таджыкістана ў тэлефоннай размове 16 жніўня.
«У выпадку абвастрэння становішча і пагрозы бяспекі Рэспубліцы Таджыкістан для аказання дапамогі саюзніку будуць прынятыя ўсе неабходныя калектыўныя захады, прадугледжаныя статутнымі дакументамі», – дадаў Зась.
Беларусь – чалец АДКБ і тэарэтычна можа выслаць туды свае войскі.
Ціманоўская выйшла на спаборніцтвы
Беларуская спартоўка Крысціна Ціманоўская ўзяла ўдзел у спаборніцтвах у польскім Шчэціне – упершыню з Алімпіяды, адкуль яе супраць волі хацелі вывезці ў Беларусь, а ў выніку эвакуявалі ў Польшчу.
Крысціна Ціманоўская расказала польскаму тэлеканалу TVP Sport, што не трэнавалася тры тыдні, што для спрынтараў вельмі шмат. Аднак 15 жніўня яна прабегла дыстанцыі ў 100 і 200 метраў.
Яна ўзяла ўдзел у спаборніцтвах «Мемарыял Веслава Маніка» ў польскім горадзе Шчэцін. Спонсарства польскай кампаніі «PKN Orlen» дазваляе ёй працягнуць трэнаванні і ўдзельнічаць у спаборніцтвах – яна кажа, гэта выводзіць яе ў новае жыццё і новы спартовы этап.
На аднаўленне касцёлу ў Будславе сабралі больш за мільён рублёў
Пра дасягненне сумы 1 млн рублёў у фондзе на аднаўленне Будслаўскага касцёлу раніцай 16 жніўня паведаміў Telegram-канал «Адновім Будслаў разам». Збору грошай не спыняюць.
Цяпер каля храму ідуць падрыхтоўчыя працы: паставілі будаўнічы кран, рыхтуюць рыштаванні, каб працаваць на даху. Раней дапамагала нямала валанцёраў.
СК belsat.eu
