Уладзімір Зяленскі сабраў пасяджэнне Савету нацыянальнай бяспекі і абароны Украіны з-за асцярогі ўварвання з боку Беларусі. Пра гэта паведаміў сакратар СНБА Аляксей Данілаў.
Паводле яго слоў, Зяленскі даручыў праверыць гатоўнасць да магчымага ўварвання ў чатырох пагранічных вобласцях Украіны.
«Што тычыцца кірунку з Беларусі. Я хачу паведаміць, што акрамя СНБА ёсць стаўка вярхоўнага галоўнакамандуючага… Учора прэзідэнт сабраў стаўку, і прагаворвалася менавіта гэтае пытанне – пытанне Беларусі.
Давалі ацэнку ўсе нашы органы, якія да гэтага маюць дачыненне – што адбываецца, у якім стане знаходзіцца сёння войска Беларусі, колькі там ваенных РФ, якія планы. Усё гэта знаходзіцца на кантролі нашага прэзідэнта, і стаўка ўчора менавіта на гэты конт працавала даволі доўга. І я лічу, што дастаткова эфектыўна. У выніку ёсць даручэнне – зараз будзе праходзіць праверка ў чатырох вобласцях стану падрыхтоўкі ў выпадку, калі будуць праходзіць паўторныя выклікі для нашай краіны», – распавёў Данілаў.
Аднак, у якіх вобласцях будзе праведзена праверка, не ўдакладняецца. З Беларуссю мяжуюць 5 абласцей Украіны: Чарнігаўская, Кіеўская, Жытомірская, Ровенская і Валынская.
Алена Рувіна belsat.eu