Пуцін і Байдэн абмеркавалі сітуацыю ў Беларусі, з дапамогі жонцы Тарайкоўскага налічылі падатак
Belsat.eu падводзіць вынікі 16 чэрвеня – 312-га дня супрацьстаяння грамадства і ўладаў.
Байдэн з Пуціным абмеркавалі Беларусь
16 чэрвеня, у швейцарскай Жэневе адбыліся перамовы прэзідэнта ЗША Джозэфа Байдэна з прэзідэнтам Расеі Уладзімірам Пуціным. На сустрэчы сярод іншага абмяркоўвалася Беларусь.
Па выніках перамоваў Байдэн заявіў, што з Пуціным таксама абмяркоўвалася тэма Беларусі.
«Мы таксама абмеркавалі Беларусь (з Пуціным. – Belsat.eu). Ён не выказваў нязгоды з маімі словамі»
ЕЗ ухваліў санкцыі супраць чыноўнікаў Беларусі
Пастаянныя прадстаўнікі краінаў Еўрапейскага Звязу ўзгаднілі абмежавальныя захады ў дачыненні Беларусі ў сувязі з пасадкаю самалёта «Ryanair» і палітычным крызісам у краіне.
«Амбасадары ЕЗ толькі што ўхвалілі забароны на выдачу візаў і замарожванне актываў 78 чалавек і 7 арганізацыяў, адказных за рэпрэсіі ў Беларусі і прымусовае спыненне рэйсу «Ryanair» 23 траўня», – паведаміў у Twitter брусельскі журналіст RFE/RL Рыкард Юзьвяк.
Новы скандал з Украінай
Сяргей Гарэнка, кіраўнік так званай «генеральнай пракуратуры» самаабвешчанай «ЛНР» у відэазвароце выказаў падзяку афіцыйнаму Менску за магчымасць дапытаць арыштаванага журналіста Рамана Пратасевіча. Адметна, што раней кіраўнік Следчага камітэту Беларусі Дзмітрый Гара, адказваючы на пытанне аб следчых з «ЛНР», заявіў 14 чэрвеня, што «ніякіх запытаў з-за мяжы аб правядзенні следчых дзеянняў з Раманам Пратасевічам не паступала».
На гэты зварот адрэагавалі ў Кіеве і патрабуюць тлумачэнняў. Раней Міністэрства замежных справаў Украіны прыгразіла Беларусі санкцыямі, а асабіста Лукашэнку – тым, што «будзе балюча», калі да Пратасевіча дапусцяць прадстаўнікоў «ЛНР», якую ва Украіне лічаць тэрарыстычнай арганізацыяй.
Літва расследуе плынь незаконных мігрантаў з Беларусі
Міністр унутраных справаў Літвы Агне Білатайце звярнулася ў Генеральную пракуратуру з нагоды арганізацыі незаконнага перамяшчэння людзей праз мяжу. Пра гэта паведамілі ў літоўскім МУС.
«Вось ужо некалькі тыдняў імігранты з трэціх краінаў незаконна перасякаюць мяжу, і мы бачым прыкметы таго, што гэта можна зрабіць арганізаваным чынам. Мы не можам мірыцца з такімі рэчамі, таму я звярнулася ў Генеральную пракуратуру з просьбаю пачаць расследаванне», – заявіла Агне Білатайце.
Раней міністр заявіла, што афіцыйны Менск вядзе гібрыдную вайну супраць Літвы.
Улады патрабуюць маліцца
На афіцыйны Дзень Незалежнасці Беларусі дзейныя ўлады запланавалі правядзенне малітвы «За Беларусь!». Пры гэтым яны заклікаюць рэлігійныя арганізацыі краіны дапамагчы з арганізацыяй набажэнства.
Стала вядома, калі будуць судзіць Дзядка
Як паведамілі «Белсату» бацькі Мікалая Дзядка, пачатак разгляду справы ў судзе прызначаны на 29 чэрвеня. Працэс адбудзецца ў Менскім гарадскім судзе, вул. Дуніна-Марцінкевіча, 1. Пачатак а 10:00.
Палітвязня вінавацяць адразу паводле трох артыкулаў Крымінальнага кодэксу: арт. 342 («Арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх»), арт. 361 («Заклікі да дзеянняў, скіраваных на прычыненне шкоды нацыянальнай бяспецы») і арт. 295 («Незаконныя дзеянні ў дачыненні агнястрэльнай зброі, боепрыпасаў і выбуховых рэчываў»).
Падчас затрымання Міколы ў лістападзе 2020 года сілавікі зладзілі ператрус жытла і знайшлі шкляныя бутэлькі з гаруча-змазачнымі матэрыяламі, якія, паводле экспертаў следства, якраз падпадаюць пад артыкул Крымінальнага кодэксу.
Улады патрабуюць заплаціць падатак з дапамогі
Падатковая інспекцыя Маскоўскага раёну Менску выставіла рахунак удаве забітага пратэстоўца Аляксандра Тарайкоўскага за грошы, якія ёй пералічылі неабыякавыя беларусы. Пра гэта паведамляе «Салідарнасць».
Падатковая палічыла дабрачынную і бязвыплатную дапамогу грамадзянаў сям’і забітага 10 жніўня 2020 года пратэстоўца Аляксандра Тарайкоўскага асабістым прыбыткам ягонай жонкі і выставіла ёй для выплаты Br 11 001,63 (каля $ 4400) падаходнага падатку. Гэтую суму грамадзянская жонка забітага Алена Герман мусіла заплаціць да 1 чэрвеня, пасля чаго штодня налічваецца пеня.
Удава лічыць несправядлівым плаціць падатак з дапамогі, якую аказалі неабыякавыя людзі. Яна падрыхтавала зварот у Менскі гарвыканкам і Менскі гарадскі Савет дэпутатаў з просьбаю вызваліць яе ад выплаты падаходнага падатку, бо гэта пагоршыць матэрыяльны стан ейнай сямʼі, у якой гадуецца чатырохгадовая дачка забітага.
Пры гэтым сям’я з прычыны адмовы ў крымінальнай справе супраць забойцы Тарайкоўскага не можа выставіць грамадзянскага пазову аб кампенсацыі шкоды ў сувязі са стратаю карміцеля.
СК belsat.eu
