Магілёўца выклікалі ў суд, каб абмежаваць права выезду. А ён 10 месяцаў таму з’ехаў у Літву
Магілёўскі актывіст і блогер Андрэй Бодзілеў атрымаў прытулак у Літве пасля таго, як яго збілі невядомыя ў масках, даставілі да сілавікоў і прымусілі запісаць «пакаяльнае відэа». Суд кліча яго на радзіму.
Праваабаронцы «Mayday» паведамілі, што актывіст Андрэй Бодзілеў атрымаў SMS-позву ў суд Ленінскага раёну Магілёва на 21 кастрычніка «ў пытанні абмежавання ў праве выезду з Рэспублікі Беларусь».
Прычына, з якой выезд з Беларусі хочуць абмежаваць чалавеку, які ўжо выехаў з Беларусі, невядомая. Ці захоча Бодзілеў наведаць суд пасля таго, што з ім было, праваабаронцы не ўдакладняюць.
16 снежня мінулага года Бодзілева жорстка затрымалі невядомыя ў масках, даставілі ва ўпраўленне барацьбы з арганізаванай злачыннасцю. Там яго апыталі ў крымінальнай справе з вывешваннем дроту на чыгунцы, а ў выніку захапілі і выдалілі ягоны Telegram-канал «Свабодны беларус». Яго прымусілі запісаць «пакаяльнае відэа», якое потым паказаў дзяржаўны тэлеканал СТВ. Удома ў актывіста адбыўся ператрус.
Андрэй вырашыў, што ў Беларусі яму цяпер заставацца небяспечна, ужо 17 снежня выехаў з краіны і папрасіў гуманітарнага прытулку ў Літве.
АА belsat.eu
