У Гомельскім абласным судзе 14 верасня пачаўся разгляд справы музыкаў рагачоўскага гурта «Tor Band». Палітвязняў абвінавачваюць адразу паводле чатырох крымінальных артыкулаў. Ім пагражае да 12 гадоў зняволення.
Беларускіх музыкаў Яўгена Бурло, Дзмітрыя Галавача і Андрэя Ярэмчыка судзяць у закрытым рэжыме. Працэс вядзе суддзя Сяргей Салоўскі.
У залежнасці ад ролі кожнага іх абвінавачваюць паводле 4 крымінальных артыкулаў:
- ч. 3 арт. 130 КК («Распальванне сацыяльнай варожасці»);
- ч. 1 і ч. 3 арт. 361-1 КК («Стварэнне экстрэмісцкага фармавання або ўдзел у ім»);
- арт. 369-1 КК («Дыскрэдытацыя Рэспублікі Беларусь»);
- арт. 368 КК за абразу Аляксандра Лукашэнкі.
10 траўня з’явілася інфармацыя, што ў палітзняволенага музыкі гурта «Tor Band» Яўгена Бурло за кратамі абвастрылася анкалагічнае захворванне, якое ён меў яшчэ да затрымання. Яўген моцна схуднеў і не можа перасоўвацца самастойна.
Музыкаў разам з жонкамі затрымалі 28 кастрычніка 2022 года ў Рагачове нібыта за падпіску на «экстрэмісцкія» каналы і перасыланне паведамленняў з іх, а потым некалькі разоў арыштоўвалі на 15 содняў. Праваабаронцы паведамлялі, што рагачоўскіх музыкаў судзілі асобна за кожную песню. Пад адміністратыўным арыштам яны былі два месяцы. Пасля музыкаў перавялі ў гомельскае СІЗА у межах крымінальнай справы.
У лістападзе іхныя песні прызналі «экстрэмісцкімі матэрыяламі». У прыватнасці, «экстрэмісцкімі» абвесцілі наступныя творы: «Жыве», «Уходи», «Кто, если не ты?», «Мацi», «Мы – не «народец», «Без вайны», «Беларус беларусу беларус», «Dead Мороз», «Мы станем сильней!», «Родная Зямля». Таксама «экстрэмісцкім» прызналі відэаролік у Instagram пад назваю «Всем здоровья, родные беларусы!!!».
Паводле праваабаронцаў, пасля затрымання музыкаў міліцыянты пачалі прыходзіць да тых, хто здымаўся ў кліпах, – гэта пераважна рагачоўцы.
«Tor Band» – вядомы беларускі гурт. Кліпы на песні «Мы не «народец», «Жыве», «Кто, если не ты?!» набралі разам каля 5 мільёнаў праглядаў на YouTube.
Алена Рувіна belsat.eu
