Сустаршыні камісіі ў пытаннях правоў чалавека ў Кангрэсе ЗША Джэймз МакГовэрн і Крыстафэр Сміт апублікавалі заяву ў сувязі з пераследам блогера Ігара Лосіка.
Кангрэсмены заявілі, што «глыбока занепакоеныя» рашэннем выставіць Лосіку новае абвінавачванне пасля 9 месяцаў перабывання за кратамі.
«Журналістыка – гэта не злачынства. Мы асуджаем брутальныя напады і фальшывыя абвінавачанні, выстаўленыя прэсе ў Беларусі за асвятленне рэпрэсіўных дзеянняў ураду Аляксандра Лукашэнкі. Ігар і іншыя палітвязні мусяць быць неадкладна вызваленыя», – падкрэсліваецца ў заяве.
Кангрэсмены таксама кажуць, што яны «шакаваныя і збянтэжаныя інфармацыяй аб пагаршэнні здароўя і маральнага духу Ігара». «Мы заклікаем яго не адмаўляцца ад надзеі і сілкавацца моцай ад сваіх прыхільнікаў у Беларусі, Злучаных Штатах і ва ўсім свеце», – гаворыцца ў заяве.
На дзень 14 сакавіка ў Беларусі прызналі палітвязнямі 285 чалавек.
ІІ Belsat.eu