Поўны спіс санкцыйных імёнаў, новыя крымінальныя справы і выключэнне са зборнай. Як прайшоў 131 дзень пратэсту

Чацвер, 17 снежня, у Беларусі стаў 131-м днём паслявыбарных пратэстаў. Людзі патрабуюць новых выбараў, адстаўкі Аляксандра Лукашэнкі, спынення і расследаванне гвалту з боку сілавікоў.

Зацверджаны новы пакет санкцыяў супраць уладаў Беларусі

Сцягі Еўразвязу. Фота: consilium.europa.eu

Рада Еўразвязу зацвердзіла 17 снежня трэці пакет санкцыяў адносна палітычнага рэжыму Аляксандра Лукашэнкі.

На гэты раз пад абмежаванні трапілі яшчэ 29 фізічных асобаў, у тым ліку Уладзімір Каранік, Наталля Качанава і Іван Эйсмант, дзевяць суддзяў, блізкія да Лукашэнкі бізнесоўцы і іншыя дзяржслужачыя.

Таксама ў чорны спіс трапілі 7 юрыдычных асобаў: прадпрыемства «Белтэхэкспарт», «Дана Холдынгз/Дана Астра», Кіраўніцтва справамі прэзідэнта, «Сінезіс», «Агат», 140-ы рамонтны завод, МЗКЦ.

У новым годзе плануюць павысіць падаткі

 

У Беларусі прапануюць часова павысіць некаторыя стаўкі падаткаў для кампенсацыі выдаткаў на барацьбу з COVID-19. Пра гэта паведаміў першы намеснік міністра фінансаў Дзмітрый Кійко:

«У якасці дадатковых захадаў на часовай аснове ў 2021-2022 гадах прапануецца павышэнне стаўкі падатку на прыбытак для аператараў сотавай сувязі і аператара па абавязковаму аказанню універсальных паслугаў электрасувязі з 18% да 30%. Стаўку падатку на прыбытак прапануецца павялічыць з 25% да 30% для ламбардаў»

У Беларусі ў 2021 годзе плануюць павысіць падаткі

За нібыта гвалт у дачыненні амапаўца студэнту далі 2 гады калоніі

У прэс-рэлізе не называецца імя студэнта і не паведамляюцца дэталі справы. Але раней МУС паведамляў пра інцыдэнт, які меў месца падчас студэнцкай акцыі пратэсту 17 кастрычніка на вуліцы Казлова. Адзначалася, што 20-гадовы берасцеец «ударыў супрацоўніка каленам у твар, калі той яго затрымліваў». На відэа, апублікаваным МУС, хлопец тлумачыў, што дзейнічаў ненаўмысна:

«Я проста ўцякаў. Магчыма, я вас зачапіў… Я нават не адчуваў. Я проста ўцякаў і ўпаў. Локцем я стукнуўся, калі ўпаў аб асфальт. Я лічу, што не кранаў. А калі зачапіў, то ненаўмысна».

Новы закон аб пазбаўленні грамадзянства Беларусі

Цяпер у чалавека могуць адабраць грамадзянства нават тады, калі ў яго няма грамадзянства іншай дзяржавы ці гарантый яго атрымання. Новаўвядзенне ня тычыцца грамадзянаў Беларусі ад нараджэння, а толькі тых, хто грамадзянства атрымаў. Змены ўступяць у сілу праз паўгода.

Чалавек можа страціць грамадзянства, калі яго прызнаюць вінаватым у экстрэмісцкай дзейнасці або прычыненні цяжкай шкоды інтарэсам дзяржавы.

Апублікавалі закон аб пазбаўленні грамадзянства Беларусі

Футбаліста Іллю Шкурына выключылі са складу нацыянальнай зборнай Беларусі на наступны год

Нападаючы маскоўскага ЦСКА Ілля Шкурын выключаны са складу моладзевай і нацыянальнай каманд на 2021 год і пазбаўлены льготы па адтэрміноўцы вайсковай службы.

Ілля Шкурын святкуе забіты гол. Фота: афіцыйны сайт ЦСКА

У жніўні Шкурын апублікаваў паведамленне ў Instagram, у якім заявіў аб адмове выступаць за нацыянальную зборную па палітычных матывах. Потым Шкурын не прыехаў на збор моладзевай зборнай Беларусі перад вераснёўскімі матчамі кваліфікацыі чэмпіянату Еўропы супраць каманд Нідэрландаў і Партугаліі.

Пасля гэтага яго прозвішча было выключаная са складу моладзевай і нацыянальнай каманд на 2021 год. Дадзены дакумент міністэрства спорту і турызму рэспублікі дазваляе футбалістам атрымаць адтэрміноўку ад вайсковай службы. Шкурын цяпер дадзенай льготы пазбаўлены.

У Горадні двума гадамі «хатняй хіміі» пакаралі 55-гадовую жанчыну, якую збілі амапаўкі

 

Справа датычыць падзеяў вечара 9 жніўня, калі ў Горадні адбываўся мітынг супраць фальсіфікацыі выбараў. Тады фармацэўта Марыну Палікарпаву затрымалі і жорстка збілі дзве прадстаўніцы АМАП – Дар’я Бандарчук і Марыя Мазуркевіч.

Марына Палікарпава ў судзе 7 снежня. Фота: belsat.eu

Бандарчук ужыла да Палікарпавай задушлівы прыём, і тая інстынктыўна ўкусіла яе за руку ў мэтах абароны. «Я рэальна спалохалася за сваё жыццё», – патлумачыла абвінавачваная. У выніку супраць жанчыны распачалі крымінальную справу паводле арт. 364 КК (гвалт або пагроза ўжывання гвалту ў дачыненні да супрацоўніка органаў унутраных справаў).

У Горадні двума гадамі «хатняй хіміі» пакаралі 55-гадовую жанчыну, якую збілі амапаўкі

Паэт Андрэй Хадановіч атрымаў прэмію Гедройца ад газеты «Rzeczpospolita»

Паэт Андрэй Хадановіч Фота: Ірына Арахоўская / Belsat.eu

Паэт, перакладчык і сябра Беларускага ПЭН-цэнтру Андрэй Хадановіч атрымаў польскую прэмію Гедройця, якую 20 гадоў уручае газета «Rzeczpospolita» за «паглыбленне дыялогу між народамі Цэнтральнай і Усходняй Еўропы».

У сваім Фэйсбуку Хадановіч адзначыў:

«Шчыра ўдзячны! Яшчэ і таму, што гэта знак падтрымкі Беларусі, нашага сёлетняга змагання за справядлівасць, нашай грамадзянскай супольнасці, што паўстае проста ў нас на вачах. Вельмі расчуліўся, пачуўшы пра «перакладчыка – будаўніка мастоў», вельмі блізкая мне (і паэтам, якіх перакладаю) думка. Вялікі дзякуй шаноўнай Агнешцы Рамашэўскай (дырэктарка «Белсату» – заўв. belsat.eu) за цёплыя словы падчас цырымоніі! І, вядома ж, шаноўным арганізатарам і сябрам журы! «Мур хутка рухне!»

Пакуль апошні амапавец…

АД / belsat.eu

Hавiны