Церцель параўнаў харугвы з ИГИЛ, распавёў пра ЦРУ ў Менску і напужаў «тэрактамі»
Старшыня Камітэту дзяржаўнай бяспекі Іван Церцель распавёў, як у Беларусь рэгулярна прыбываюць супрацоўнікі амерыканскага ЦРУ, як Польшча рыхтуе пераемнікаў «Ісламскай дзяржавы» і заявіў, што супрацьстаяць вайне могуць толькі людзі з «перакуленай свядомасцю».
Кіраўнік КДБ заявіў, што ў Польшчы цяпер сем харугваў «рыхтуюцца да тэрактаў і захопу аб’ектаў на беларускай тэрыторыі». Магчыма, гаворка пра Паспалітае рушэнне.
«Найбольш агрэсіўная харугва трэнуецца ў Беластоку на вуліцы кардынала Вышыньскага, 6а [на гэтым адрасе месціцца беларускі хаб «Новая Зямля». – Рэд. belsat.eu]. Ёй кіруе наш грамадзянін Асадулаеў 1991 года нараджэння, які некалі навучаўся ў Вайсковай акадэміі і ўцёк за мяжу. Ён хаваецца пад псеўданімам «Шляхціц». Гэта адна з найбольш агрэсіўных структураў», – сказаў Іван Церцель.
Ён заявіў, што нават ведае імёны супрацоўнікаў польскіх спецслужбаў, якія нібы курыруюць дзейнасць гэтых харугваў. Паводле яго, «гэтая публіка хацела б здзейсніць правакацыі з ужываннем метадаў 1939 года», намякнуўшы на «правакацыі немцаў з выкарыстаннем польскай формы адзення».
Таксама Церцель згадаў і «Ісламскую дзяржаву» і «гісторыю іх дачыненняў з амерыканскімі спецслужбамі». Паводле яго, з харугвамі могуць быць «такія ж адмоўныя вынікі». Адзначым, што «Ісламскую дзяржаву» стваралі менавіта праціўнікі інтэрвенцыі ЗША ў Ірак, якія не мелі саюзных стасункаў з амерыканскімі спецслужбамі.
Старшыня КДБ таксама распавёў, што ў Беларусь прыбываюць замежныя выведнікі, у тым ліку «нядаўна былі супрацоўнікі ЦРУ», якія нібы здзівіліся, што народ у Менску «не галадае, транспарт працуе, людзі жывуць сваім жыццём».
Супраца СБУ і ByPol
Церцель пацвердзіў затрыманне ў Расеі беларуса, які дзеля супрацьстаяння расейскай агрэсіі ва Украіне здзейсніў дыверсіі на БАМе. Паводле кіраўніка КДБ, «матывам стала перакуленая свядомасць і перакуленыя ўяўленні і каштоўнасці». Ён сказаў, што беларуса нібы дыстанцыйна вербавалі ўкраінскія спецслужбы, якія, паводле яго, шчыльна супрацоўнічаюць з ByPol.
Старшыня КДБ заявіў, што ведамства ўдзельнічае ў следстве над затрыманым у Расеі беларусам.
Увечары 29 лістапада на перагоне Ітыкіт – Акусікан у Бураціі падчас руху па тунэлі на Байкала-Амурскай магістралі загарэўся вагон грузавога цягніка, у склад якога ўваходзіла 41 цыстэрна з палівам, тры з авіяцыйным палівам і шэсць вагонаў з чорным металам. Пазней на гэтым жа ўчастку адбыўся другі падрыў грузавога цягніка, які рухаўся па аб’язным пуці. У выніку чатыры цыстэрны з палівам згарэлі, яшчэ дзве атрымалі пашкоджанні. Выбухі цягнікоў у Паўночнамуйскім тунэлі БАМу кваліфікавалі як тэракт.
7 снежня ФСБ Расеі паведаміла аб затрыманні ў Омску падазраванага грамадзяніна Беларусі Сяргея Ерамеева. Суд арыштаваў яго да 30 студзеня 2024 года. Затрыманы заявіў, што выбухамі хацеў паралізаваць рух на чыгунцы, каб перашкодзіць перавозу ваенных грузаў.
Якуб Хруст belsat.eu
