13 верасня Агульны сход удзельнікаў ТАА «Кантынентальная хакейная ліга» абраў новы склад Савету дырэктараў КХЛ на сезон 2021/2022. У яго не ўвайшоў былы кіраўнік Федэрацыі хакею Беларусі і старшыня назіральнага савету менскага «Дынама» Дзмітрый Баскаў.
Замест Баскава ў савеце КХЛ будзе генеральны дырэктар ЗАТ «Хакейны клуб «Дынама» (Менск) Сяргей Сушко.
Нагадаем, што Дысцыплінарная камісія Міжнароднай федэрацыі хакею на лёдзе (МФК) вырашыла дыскваліфікаваць старшыню Федэрацыі хакею Рэспублікі Беларусь (ФХРБ) Дзмітрыя Баскава. Рашэнне апублікавалі 8 верасня.
Рашэнне прынялі пасля 10-месячнай праверкі дысцыплінарнай камісіі. Тая прызнала Баскава вінаватым у парушэнні нормаў паводзінаў МФК, а менавіта – у спробах беспасярэдняга ўплыву на іншых, каб тыя падтрымлівалі ўрад Беларусі, у пагрозах і дыскрымінацыі беларускіх атлетаў за іхныя палітычныя погляды. Таксама Баскава прызналі вінаватым у парушэнні артыкулу 5 Алімпійскай хартыі і правілаў МФК праз адкрытае падтрыманне Аляксандра Лукашэнкі.
Пасля гэтага Дзмітрый Баскаў напісаў заяву аб сыходзе з Федэрацыі хакею Беларусі.
МГ belsat.eu