Родныя палітзняволенага Мікіты Емяльянава распавялі «Белсату», што ў вязня пагоршылася здароўе. Раней Мікіту пакаралі 35 соднямі карцару, адбываць пакаранне ён будзе да 16 красавіка.
Родныя палітычнага вязня Мікіты Емяльянава даведаліся, за што яго пакаралі 35 соднямі карцару:
«Штодня яму загадваюць прыбіраць дворык для шпацыру. А Мікіта штодня адмаўляецца. Склалі на яго шмат рапартаў за тое, што не падпарадкоўваецца».
Таксама стала вядома, што ў карцары ў Мікіты пачаліся праблемы са здароўем. Паводле сваякоў вязня, гэта наступствы ежы, якую там даюць. У Мікіты пачалася пякотка, хлопцу прапісалі нейкія пігулкі:
«Цяпер у карцары Мікіта робіць штодня фізічныя практыкаванні. Паўтарае з памяці нямецкую мову і геаграфію, каб мозг працаваў. У карцары ацяплення хапае, раней было горш».
Калі Мікіта быў у звычайнай камеры, яшчэ да 12 сакавіка, за восем дзён яму не ўручылі ніводнага ліста.
21-гадовага актывіста анархісцкага руху Мікіту Емяльянава затрымалі ў кастрычніку 2019-га, пазней судзілі за тое, што кінуў лямпачку з чырвонаю фарбай у будынак Менскага гарадскога суда, дзе ў той дзень мусіў пачацца суд на Дзмітрыем Паліенкам, а потым Мікіта двойчы кідаў кактэйль Молатава ў дзверы ізалятару на Валадарскага.
Свой учынак хлопец патлумачыў тым, што выступае супраць пераследу палітычных вязняў. У лютым 2020 года Мікіту назвалі вінаватым паводле трох артыкулаў Крымінальнага кодэксу і засудзілі на 7 гадоў зняволення, але ў выніку апеляцыі пакаранне зменшылі да 4 гадоў. Спачатку хлопец адбываў тэрмін у бабруйскай калоніі, потым яго як парушальніка рэжыму перавялі ў магілёўскую крытую турму № 4.
У Магілёве Мікіту Емяльянава асудзілі на два гады пазбаўлення волі паводле ч. 2 арт. 411 КК («Зацятае непадпарадкаванне патрабаванням адміністрацыі папраўчай установы за парушэнне правілаў унутранага распарадку»), а канчаткова прызначылі па сукупнасці прысудаў з улікам раней не адбытага пакарання 3,5 года калоніі ўзмоцненага рэжыму.
Праваабаронцы Беларусі прызналі Мікіту палітычным вязнем.
Мікіта Емяльянаў адбывае пакаранне ў турме. Падтрымайце яго лістом:
Турма № 4, вул. Крупскай, 99А, 212011, г. Магілёў
