«Белсат» падводзіць вынікі нядзелі, 13 лютага.
«Еўрарадыё» са спасылкай на ўласныя крыніцы паведаміла, што Дзяржаўная памежная служба Украіны на перыяд вучэнняў «Саюзная рашучасць» вырашыла не пускаць у краіну ўсіх мужчын прызыўнога ўзросту з беларускім грамадзянствам. Афіцыйна пра гэта абвешчана не было, але па факце ў грамадзянаў Беларусі з 11 лютага пачалі ўзнікаць праблемы на ўкраінскай мяжы. 13 лютага праблемы з уездам ва Украіну ўзніклі ў гурту J:МОРС, хаця ў іх на 14 лютага запланаваны канцэрт у Кіеве.
На фоне інфармацыі аб магчымым наступе Расеі на Украіну амерыканскія супрацоўнікі місіі АБСЕ (а некаторых звестках таксама брытанскія і дацкія) пакінулі Данецк, які кантралююць баевікі ДНР. Тым часам працягваецца канцэнтрацыя расейскіх войскаў на мяжы з Украінай: паводле «Conflict Intelligence Team», 1-я гвардзейская танкавая армія Узброеных сілаў Расеі пакідае палігон пад Варонежам і перакідвае дадатковую тэхніку да ўкраінскай мяжы.
Эскалацыя крызісу можа прывесці да спынення паветранага руху над Украінай. Паводле інфармацыі дэпутата Вярхоўнай Рады Аляксея Ганчарэнкі, з 14 лютага адна з найбуйнейшых страхавых брытанскіх кампаній адмаўляецца страхаваць цывільныя самалёты ў паветранай прасторы Украіны. Аднак Офіс прэзідэнта Украіны і Міністэрства інфраструктуры заявілі, што інфармацыя аб закрыцці паветранай прасторы не адпавядае рэчаіснасці.
Гімназіі № 6 у Горадні прысвоілі імя Фелікса Дзяржынскага – стваральніка савецкіх карных органаў, арганізатара чырвонага тэрору.
У Беларусі дзяржаўная статыстыка зафіксавала чарговы ковідны рэкорд: 8 921 новы выпадак інфікавання COVID-19 за содні.
Палітвязня Мікалая Дзядка этапавалі ў калонію, але пакуль невядома ў якую.
У Алматы прайшоў жалобны мітынг памяці загінулых падчас студзеньскіх падзеяў – сабралася каля 700 чалавек.
РР belsat.eu