11 снежня была знятая блакада памежнага пераходу «Ягадын – Дарогуск» паміж Украінай і Польшчай. Пра гэта паведаміў міністр інфраструктуры Украіны Аляксандр Кубракоў.
«Блакаванне пункту пропуску “Ягадын – Дарогуск” скончанае. З 14:00 адноўлены стабільны рух цяжкавікоў. У кірунку Украіны праехалі 15 транспартных сродкаў – яны на пункце пропуску. Таксама афармляюцца 25 цяжкавікоў – накіроўваюцца ў бок Польшчы», – напісаў 11 снежня на сваёй старонцы ў Facebook Аляксандр Кубракоў.
Ён нагадаў, што блакаванне гэтага найбуйнейшага памежнага пункту пропуску паміж дзвюма краінамі працягвалася больш за месяц. Разблакаванне руху было вынікам шматлікіх сустрэчаў і перамоваў на «ўсіх магчымых узроўнях».
«Гэта была складаная праца, але яна яшчэ не скончаная. Мяжа павінна быць цалкам разблакаваная, і ніякіх будучых блакадаў мы не павінны дапусціць», – падкрэсліў Аляксандр Кубракоў.
Дагэтуль польскія кіроўцы цяжкавікоў, якія дамагаюцца большага кантролю над украінскімі перавознікамі, блакуюць таксама пераезды ў Грэбэнным і Карчовай. Да разблакавання і гэтых пунктаў пропуску заклікала еўракамісарка ў справах транспарту Адына Вэлеан.
«Я хачу нагадаць усім бакам пра шкоду, якую наносяць гэтыя пратэсты еўрапейскай эканоміцы, сеткам даставаў, іншым дарожным аператарам і Украіне – краіне, якая цяпер у стане вайны. Астатнія памежныя пункты павінны быць неадкладна разблакаваныя», – цытуе словы еўракамісаркі «tvn24».
Украінскія медыі паведамлялі ўвечары 11 снежня, што памежны пункт у Дарогуску зноў спрабавалі блакаваць.
Пратэст польскіх перавознікаў працягваецца з 6 лістапада. Палякі блакавалі памежныя пераходы ў Дарогуску, Грэбэнным і Карчовай. Сярод іншага пратэстоўцы патрабуюць увядзення Украінай асобнай чаргі для аўтамабіляў, якія вяртаюцца ў Польшчу без тавару, увядзення камерцыйных дазволаў для ўкраінскіх фірмаў (за выключэннем тых выпадкаў, калі перавозіцца гуманітарная дапамога і абсталяванне для ЗСУ), скасавання ліцэнзіяў для ўкраінскіх фірмаў, створаных пасля пачатку вайны ва Украіне, ліквідацыі электроннай чаргі з украінскага боку.
Зміцер Міраш belsat.eu