Як вызваляць палітвязняў, калі ў Беларусі трываюць рэпрэсіі? Дыскусія Каардынацыйнай рады
Каардынацыйная рада працягвае дыскутаваць на тэму вызвалення палітвязняў. «Белсат» транслюе дыскусію на тэму: «Вызваленне палітвязняў — здрада ці перамога? Ці можна вызваляць людзей, калі ў краіне працягваюцца рэпрэсіі?».
У Беларусі вельмі шмат палітычных зняволеных. Але дакладная колькасць невядомая: сваякі вязняў і самі зняволеныя баяцца, што «афіцыйны» статус можа пагражаць дадатковымі рэпрэсіямі, а перавагаў ад статусу не будзе. У час мінулай дыскусіі гэта згадвалі – і праваабаронцы запэўнівалі, што рэпрэсіі чыняць без аглядкі на спісы «Вясны» ці іншых арганізацыяў, а зняволеным аказваюць падтрымку незалежна ад статусу.
Таксама існуюць розныя крытэры: «Вясна» і шэраг арганізацыяў лічыць, што палітвязняў цяпер каля 1500, тады як «DissidentBy» налічвае 1768 зняволеных з палітычных матываў і настойвае на больш шырокім азначэнні «палітвязень», бо лічыць старыя крытэры неактуальнымі пасля прававога дэфолту. Прадстаўніца Аб’яднанага пераходнага кабінету ў сацыяльных пытаннях Вольга Гарбунова казала, што ў Беларусі можа быць больш як пяць тысяч палітвязняў, але «Вясна» перакананая, што разыходжанне з іхнымі лічбамі не такое вялікае.
Але як вызваляць людзей, калі на іх месца садзяць новых? Пра гэта 12 траўня а 17-й гадзіне па Менску будуць дыскутаваць палітолаг Павел Усаў, прадстаўнік Аб’яднанага пераходнага кабінету ў замежных справах Валер Кавалеўскі і прадстаўніца аб’яднання сваякоў палітвязняў Святлана Мацкевіч. Дыскусію будзе мадэраваць сябра Каардынацыйнай рады, журналіст Ян Рудзік.
