12 траўня прадстаўнікі крымінальнага вышуку правялі ператрус у офісе баранавіцкага выдання «Intex-press». Гэта звязана са справай затрыманага журналіста Юрыя Ганцарэвіча, якога абвінавачваюць у фатаграфаванні расейскай вайсковай тэхнікі і «экстрэмісцкай дзейнасці», паведамляе само выданне.
Юрыю Ганцарэвічу было прад’яўлена абвінавачанне паводле артыкула 361-4 ч.1 ККРБ (садзейнічанне экстрэмісцкай дзейнасці). Журналіста затрымалі за тое, што ён нібыта сфатаграфаваў расейскую ваенную тэхніку і даслаў здымкі ў СМІ, якое было прызнана «экстрэмісцкім».
У выніку ператрусу была канфіскаваная фотатэхніка, з дапамогай якой, як пазначана ў пастанове на ператрус, былі зроблены здымкі ваеннай тэхнікі на аэрадроме ў Баранавічах.
Журналіст быў пераведзены ў СІЗА №6 г. Баранавічы.
ЗХ belsat.eu