Вакол юнай расейскай фігурысткі разгарэўся неадназначны допінгавы скандал. У чым справа, «Белсату» патлумачыў прадстаўнік Фонду спартовай салідарнасці.
Сітуацыя, звязаная з допінгавай справай 15-гадовай фігурысткі Камілы Валіевай усцяж няўцямная.
Расейскі бок абараняецца як можа: спартоўку падтрымліваюць, суцяшаюць, а на ўвесь свет галосяць, што дзяўчынка абсалютна чыстая. Такога меркавання прытрымліваюцца як спартоўцы, гэтак і дзеячы з Дзярждумы, Федэральнага сходу і, нават, Крамлю. А за апошнія содні з’явілася яшчэ больш папярэдняй інфармацыі, праз якую расейцы імкнуцца даказаць, што гісторыя з Валіевай – гэта правакацыя, пісьменна спланаваная акцыя не сяброўскага Захаду.
Процілеглы бок наўпрост не выступае за дыскваліфікацыю Камілы Валіевай, але «расейскі допінгавы сіндром», які шлейфам цягнецца за нашымі ўсходнімі суседзямі яшчэ з Алімпіяды 2014-года, вымушае рабіць высновы, што там нічога не змянілася.
Былы генеральны сакратар Нацыянальнага Алімпійскага камітэту Беларусі, а цяпер кіраўнік міжнароднага дэпартаменту Беларускага Фонду спартовай салідарнасці Анатоль Котаў не прадказвае нічога добрага ў гэтай справе для Расеі:
«Для Камілы Валіевай гэта сітуацыя вельмі прыкрая. Бо для міжнароднага спартовага права ўсё тое, што тычыцца допінгу, амаль не мае значэння, якім чынам і ў якой колькасці забароненае рэчыва трапіла ў арганізм спартоўца. Тут вельмі суворыя пакаранні так ці інакш. І ўжо нікога не хвалюе: уплывае яно на вынікі, ці не, – але яно там было. І, што самае важнае, гэтае рэчыва ўжо знаходзіцца ў спісе забароненых».
Антон Поганка, дырэктар антыдопінгавай лабараторыі Каралінскага інстытуту ў Стакгольме, якая даследвала спробу Камілы Валіевай, адмовіўся каментаваць затрымку аналізу тэсту, узятага ў спартоўкі на чэмпіянаце Расеі ў Санкт-Пецярбургу напрыканцы снежня, спаслаўшыся на тое, што ніякім чынам не дазволена пра штосьці казаць, калі яшчэ ідзе разбіральніцтва. І чаму спраўджванне спробы расейскай фігурысткі заняла 45 дзён замест звычайных двух-трох тыдняў, пакуль не вядома.
Але тое, што лабараторыя апрацоўвае аналізы, якія пазначаныя штрых-кодамі і ніхто не ведае, каму са спартоўцаў менавіта гэтая спроба належыць, адводзіць падазрэнні ў прадузятасці.
Анатоль Котаў працягвае:
«На маю асабістую думку, вынік будзе хутчэй за ўсё не на карысць спартоўкі, бо сведчанні пацвярджаюць, што рэчыва было. І розныя канспіралагічныя тэорыі наконт нейкага міфічнага дзеяння спецслужбаў, наконт наўмыснага затрымання спробы ў Стакгольмскай лабараторыі – зараз не ўлічваецца.
Але пры гэтым фактычна можна казаць аб тым, што расейскі бок ведаў аб праблемах у спартоўкі і замест таго, каб неяк своечасова ратаваць сітуацыю – ускрыць дадатковую спробу «В», альбо ўносіць карэктывы ў склад каманды – была спроба замесці ўсё пад дыван і адцягнуць вырашэнне пытання.
Але акурат падчас Алімпіяды гэтая праблема і стрэліла. Беручы пад увагу ўзрост Камілы, адназначна магу сказаць, што ёй прыйдзецца несці ўсю адказнасць на сябе. Але віна не яе, а тых дарослых людзей, хто яе трэнаваў, а таксама лекара. Допінгавыя справы вельмі рэдка выгульваюцца».
Пакуль Валіева мае магчымасць трэнавацца. 15-га лютага ў фігурыстак спаборніцтвы ў кароткай праграме. Але да гэтага часу ўжо вызначыцца статус Камілы на Алімпіядзе: ці яна працягвае свой выступ, ці выдаляецца з Гульняў.
Міжнародны Алімпійскі камітэт, Сусветнае антыдопінгавае агенцтва і Міжнародны звяз канькабежцаў аспрэчылі рашэнне Расейскага антыдопінгавага агенцтва аб адмене часовай дыскваліфікацыі Камілы Валіевай і падалі пазоў у Міжнародны арбітражны суд, выязная мадэль якога працуе падчас кожнай Алімпіяды, каб можна было тэрмінова вырашаць некаторыя пытанні. Праўда, «тэрмінова» не заўсёды атрымліваецца.
Адносна нядаўні прыклад дачаснага выезду з Алімпіяды ў Токіа беларускі Крысціны Ціманоўскай пра гэта красамоўна сведчыць, лічыць Анатоль Котаў:
«Пасля падачы ўсіх дакументаў і складання апеляцыйнай камісіі разгляд і вынясенне рашэння Міжнародным арбітражам павінныя адбыцца цягам 24-х гадзінаў. Але часам так не працуе. У гісторыі з Крысцінай Ціманоўскай гэты тэрмін не быў вытрыманы і яна пазбавілася шанцаў прыняць удзел у наступным старце».
Паводле Анатоля Котава, калі Міжнародны Алімпійскі камітэт узяўся за справу абскарджваць рашэнне РУСАДА, то там вераць у тое, што дамогуцца свайго.
Паседжанне Міжнароднага спартовага арбітражнага суду, які абвесціць рашэнне аб допуску Валіевай да далейшых спаборніцтваў на Алімпіядзе, распачнецца ўдзень у нядзелю, 13 лютага, а вынік будзе абвешчаны ў другой палове дня паводле пекінскага часу 14 лютага, напярэдадні спаборніцтваў у кароткай праграме. Арбітрамі выязной панэлі CAS паводле справы Валіевай выступяць італьянец Фабіа Людзіка (старшыня камісіі), Джэфры Бэнц са Злучаных Штатаў Амерыкі ды славенка Весна Бергант Ракачэвіч.
Аляксандр Пуціла belsat.eu