Сустрэча Аляксандра Лукашэнкі і Уладзіміра Пуціна можа адбыцца ў канцы лютага. Пра гэта заявіў 12 лютага міністр замежных справаў Беларусі Уладзімір Макей, перадае ТАСС.
Макей распавёў, што сустрэчу плануюць, рыхтуюцца адпаведныя матэрыялы, каб Лукашэнка і Пуцін маглі сустрэцца, «скажам так, у канцы лютага».
«З улікам пандэмічнай сітуацыі, з улікам таго, што апошнім часам адбываецца вакол нашых дзяржаваў, я думаю, што прэзідэнтам Беларусі і Расеі будзе пра што пагаварыць. Больш за тое, упэўнены, што на стале ў іх у парадку дня будуць і канкрэтныя пытанні, звязаныя з далейшым паглыбленнем інтэграцыі паміж нашымі дзяржавамі», – дадаў Макей.
Між тым прэс-сакратар кіраўніка расейскай дзяржавы Дзмітрый Пяскоў напярэдадні паведаміў, што пакуль заўчасна казаць пра тэмы, якія будуць абмяркоўвацца падчас візіту ў РФ Лукашэнкі. Паводле яго, «візіт працягвае рыхтавацца, парадак дня фармулюецца».
«Пакуль не буду ў якія-кольвек дэталі ўдавацца, лічу гэта заўчасным», – сказаў Пяскоў.
Раней расейскае выданне «Коммерсантъ» паведаміла, што Лукашэнка і Пуцін амаль дамовіліся пра новы крэдыт дзейным уладам Беларусі. Кажуць, што беларускі бок хацеў бы атрымаць $ 3–3,5 млрд.
Крыніцы расейскага выдання адзначаюць, што прынцыпова ўжо ўсё вырашана, а адсоткі, тэрміны і памер сумы абмяркоўваюцца. Сама сустрэча можа адбыцца 22 ці 25 лютага ў Сочы.
МГ, belsat.eu