Працаўнікі дрэваапрацоўчых прадпрыемстваў не толькі не могуць звольніцца без згоды кіраўніцтва, але і будуць вымушаныя вяртаць грошы, калі іх звольняць за парушэнне працоўнай дысцыпліны ці з іншых прычынаў.
Поўны тэкст дэкрэту № 9, які ўводзіць новыя нормы, апублікавала дзяржаўнае інфармацыйнае агенцтва БелТА. Паводле дакументу, усе працаўнікі дрэваапрацоўчых прадпрыемстваў пераводзяцца на кантракт. «Скасаванне кантракту ў перыяд рэалізацыі інвестыцыйных праектаў з ініцыятывы працаўніка базавай арганізацыі магчымае толькі са згоды наймальніка»,– адзначаецца ў п. 1.2 дэкрэту.
Дзеянне акту ахоплівае наступныя прадпрыемствы:
- «Барысаўдрэў»
- «Віцебскдрэў»
- «Гомельдрэў»
- «Івацэвічдрэў»
- «Мастоўдрэў»
- «Рэчыцадрэў»
- «ФанДОК» (Бабруйск)
- «Магілёўдрэў»
- Мазырскі дрэваапрацоўчы камбінат
Згодна з дэкрэтам, працаўнікі гэтых прадпрыемстваў маюць атрымліваць, апроч заробкаў, яшчэ і штомесячныя дадатковыя выплаты «ў памеры, які вызначае наймальнік». Гэтыя дадатковыя грошы цягам месяца давядзецца вяртаць прадпрыемству, калі кантракт будзе скасаваны з ініцыятывы наймальніка «ці праз абставіны, што не залежаць ад волі бакоў». Калі звольнены працаўнік не выплаціць гэтых грошай, суд можа змусіць яго працаўладкавацца, і сумы будуць вылічвацца з заробку з месца новай працы.
Зміцер Ягораў
belsat.eu
