У жыхароў Магілёва 5 і 6 снежня сілавікі правялі масавыя ператрусы, паведамляе тэлеграм-канал «MAYDAY».
Пра хвалю рэпрэсіяў тэлеграм-каналу «MAYDAY» распавялі магілёўскія журналісты. Імаверна, ператрусы звязаныя з прызнаннем двух магілёўскіх медыяў – mogilev.media і «6TV» – «экстрэмісцкімі фармаваннямі».
Сярод тых, да каго прыйшлі сілавікі, – магілёўцы Барыс Вырвіч, Аляксандр Агееў, Аляксей Бацюкоў, Ігар Шаруха, Пётр Мігурскі (інфармацыя ўдакладняецца) і Сяргей Антонаў з Быхава. Імаверна, ува ўсіх была вынятая тэхніка і тэлефоны, пералічаныя асобы засталіся без сувязі.
29 лістапада КДБ прызнаў «экстрэмісцкімі фармаваннямі» два магілёўскія медыя – mogilev.media і «6TV». У адпаведным спісе пазначаныя таксама асобы, якія, паводле сілавікоў, маюць дачыненне да згаданых СМІ, – Уладзімір Лапцэвіч, Аляксандр Буракоў і Дзмітрый Салаўёў.
З канца лістапада ў Беларусі прайшла хваля ператрусаў у актывістаў і журналістаў, у тым ліку ў тых, якія выехалі за мяжу. 28 лістапада сілавікі перавярнулі кватэры людзей, звязаных з Каардынацыйнай радай, таксама прыйшлі да бацькоў некаторых з актывістаў. Да 8 снежня агулам прайшло больш за 200 ператрусаў.
Марыя Міхалевіч belsat.eu