Хакерская групоўка «Кібер-Партызаны» апублікавала запісы перамовы першага намесніка начальніка УУС Віталя Казлова і кіраўнікоў РАУС па Менскай вобласці, дзе яны абмяркоўваюць абарону сілавікоў.
У размове выконваючы абавязкі начальніка УУС Віталь Казлоў кажа аб выніках экстранай нарады з міністрам унутраных спраў па пытаннях абароны асабовага складу і аб тым, што «кардынальна змяняюцца падыходы ў працы па ахове грамадскага парадку».
«Можаце сабе ў штодзённіку пазначыць: міліцыянер – асоба недатыкальная. Любая форма ўздзеяння гвалту, ці то фізічная, ці то псіхалагічная, наезды па тэлефоне, абразы і гэтак далей, павінны спыняцца неадкладна па ўсёй строгасці закона», – кажа Казлоў.
Звяртаючыся да кіраўнікоў РАУС Казлоў кажа, што гэта іх персанальная адказнасць, што гэта яны дапусцілі такія выпадкі, якія маюць месца быць у інтэрнэце, «калі вырадкі падыходзяць да патрульных нарадаў» і пачынаюць у іх нешта пытаць. «Вы не вучыце людзей як у такіх экстрэмальных сітуацыях паступаць», – указвае Казлоў.
«Імгненна гэта павінна кваліфікавацца як умяшанне, назойлівае прыставанне і гэтак далей. Любы дэбіл, які падыходзіць з гэтым тэлефонам, павінен сядзець у турме».
Таксама Казлоў звяртае ўвагу, што пасля затрымання павінна з’явіцца інфармацыя, якая ганіць затрыманага і для яго павінны стварыць «спецыяльныя» умовы. І паказаць, што потым адбылося з «фігурантам, які перашкаджае міліцыі выконваць свае абавязкі».
Як прыклад ён прыводзіць выпадак, калі АМАП пры затрыманні выбіў шкло ў машыны і праз яго дастаў пасажыраў. І адзначыў, што ўсім будзе давацца ацэнка, хто як з кіраўнікоў на гэта ўсё рэагуе.
АД, belsat.eu