Да другой гадавіны з пачатку жаночых маршаў, 12 жніўня, Майстэрня паштовак салідарнасці разам з кампаніяй #FreeViasna зрабілі стыкерпак, які дапаможа выказаць павагу, любоў і пяшчоту палітзняволеным жанчынам.
«Мы дашлем налепкі ўсім ім за краты і запрашаем вас дадаць вашыя словы падтрымкі», – пішуць праваабаронцы «Вясны».
Прапануецца пакінуць вестачку любой палітзняволенай жанчыне ў онлайн-форме Майстэрні, а валанцёркі і валанцёры перапішуць яе на дызайнерскую паштоўку і дашлюць разам са стыкерпакам.
Напісаць можна як некалькі кароткіх сказаў са словамі падтрымання, так і паўнавартасны ліст. Лісты перапісваюцца на дызайнерскія паштоўкі Майстэрні.
Калі вестачкі атрымаюць не ўсе жанчыны, праваабаронцы абяцаюць самыя ім падпісаць паштоўкі салідарнасці.
«Наш салідарны абавязак – падтрымаць жанчын у няволі. Давайце зробім гэта разам!» – заклікае «Вясна».
Якуб Хруст belsat.eu