Магілёўскі абласны суд палічыў, што жыхар Бабруйску Анатоль Яскевіч сваймі ролікамі ў TikTok распальваў варожасць (ч. 1 арт. 130 Крымінальнага кодэксу) і абражаў Аляксандра Лукашэнку (ч. 2 арт. 368 Крымінальнага кодэксу). Пра гэта паведамляе праваабарончы цэнтр «Вясна».
Як сцвярджала следства, у траўні 2021 года, выкарыстоўваючы навіну аб крушэнні вайсковага самалёта ў горадзе Баранавічы, 35-гадовы Яскевіч размяшчаў у адкрытым доступе відэазвароты, якія нібыта былі накіраваныя на распальванне сацыяльнай варожасці і варажнечы ў дачыненні супрацоўнікаў сілавых ведамстваў.
Таксама ў траўні 2021 года ён размясціў у TikTok у адкрытым доступе тры відэазвароты, у якіх абвінаваціў Аляксандра Лукашэнку ў цяжкіх і асабліва цяжкіх злачынствах.
За гэта суддзя Ігар Зямцоў прызначыў Яскевічу пакаранне ў выглядзе пазбаўлення волі на тэрмін 4 гады 6 месяцаў у калоніі агульнага рэжыму.
Прысуд быў абвешчаны яшчэ 6 ліпеня, але праваабаронцы даведаліся пра гэта толькі цяпер.
Глеб Нержын belsat.eu
