Прадстаўнік акупацыйнай адміністрацыі ў Херсонскай вобласці Кірыл Стрэмаусаў плануе звярнуцца да прэзідэнта Расеі Уладзіміра Пуціна з просьбаю далучыць усю вобласць да Расеі. Пры гэтым выключыў нават правядзенне рэферэндуму, піша «РИА Новости».
«Ніякія ХНР на тэрыторыі Херсонскай вобласці стварацца не будуць. Гэта будзе адзіны ўказ на аснове звароту кіраўніцтва да прэзідэнта РФ, і будзе просьба ўвесці вобласць у склад паўнавартаснага рэгіёну Расеі», – сказаў Стрэмаусаў.
Між тым Дзмітрый Пяскоў, прэс-сакратар Пуціна, намякнуў, што рэферэндум усё ж мае быць:
«Гэтае пытанне павінна быць дакладна выверанае і ацэненае юрыстамі, бо падобныя лёсавызначальныя рашэнні павінны мець дакладную юрыдычную падаплёку, быць абсалютна легітымнымі, як гэта было ў выпадку з Крымам».
Між тым у Офісе прэзідэнта Украіны заявілі, што «адзіны зварот, які могуць падрыхтаваць гаўляйтары Херсонскай вобласці, – гэта просьба аб памілаванні пасля рашэння суда».
«Акупанты могуць папрасіць далучыцца хоць да Марса ці Юпітэра. Украінская армія вызваліць Херсон, якія б словы ні прыдумлялі акупанты», – сказаў Міхайла Падаляк.
ПС belsat.eu