Пахаванне беларускі Лізаветы, якая загінула пасля нападу ў цэнтры Варшавы, адбудзецца ў чацвер, 14 сакавіка, а 13:00 на варшаўскіх Паўночных могілках (Północny cmentarz) у зале С. Пра гэта паведаміў «Белсату» сябар Лізаветы Даніла.
Даніла таксама выказаў вялікую падзяку ўсім за шчырае падтрыманне.
«Я атрымаў вялізную колькасць прапановаў дапамогі ад беларусаў, украінцаў, палякаў. Дактары, юрысты, святары і проста неабыякавыя людзі ўвесь гэты час падтрымлівалі, дапамагалі, былі побач, маліліся. Дзякую за Вашыя добрыя сэрцы і падтрыманне.
Ведаю, што шмат хто з Вас жадае правесці Лізу ў апошні шлях. Ліза не была ні палітычнай, ні публічнай персонай, і мы не жадаем рабіць з гэтага мерапрыемства мітынгу. Гэтае пахаванне і слова будзе нададзенае толькі святарам і блізкім», – паведаміў хлопец.
25 лютага ў Варшаве на 25-гадовую Лізавету напаў 23-гадовы Дор’ян С., згвалціў яе і душыў, праз што ў Лізаветы здарылася гіпаксія. Гэта пацягнула за сабою незваротныя наступствы для мазгоў. 1 сакавіка беларуска памерла ў шпіталі. Нападніка затрымалі праз некалькі гадзінаў пасля здзяйснення злачынства.
Арсен Рудэнка belsat.eu
