У штаб-кватэры NATO 11 сакавіка ўпершыню быў узняты сцяг Швецыі. Гэта адбылося на цырымоніі, прысвечанай далучэнню краіны да Паўночнаатлантычнага альянсу. Швецыя зрабілася 32-м хаўруснікам NATO 7 сакавіка.
Выступаючы перад цырымоніяй, генеральны сакратар NATO Енс Стольтэнбэрг падзякаваў прэм’ер-міністру Швецыі Ульфу Крыстэшану за ягонае моцнае асабістае лідарства і прыхільнасць да ўступлення Швецыі ў NATO.
«Швецыя заняла сваё законнае месца за сталом NATO пад абаронай пятага артыкулу – найвышэйшай гарантыі нашай свабоды і бяспекі. Усе за аднаго і адзін за ўсіх», – сказаў Стольтэнбэрг.
Сутнасць пятага артыкулу NATO палягае ў тым, што пры вайсковай атацы на чальца Альянсу ўсе астатнія краіны ўступаюцца за яго. Такім чынам, агрэсар будзе вымушаны ваяваць з усім NATO.
Генеральны сакратар NATO таксама сказаў:
«Уступленне Швецыі ў NATO яшчэ раз паказвае, што дзверы NATO застаюцца адкрытымі. Ніхто не можа іх закрыць. Кожная краіна мае права выбіраць свой уласны шлях, і мы ўсе выбіраем шлях свабоды і дэмакратыі».
Швецыя і Фінляндыя падалі заяўкі на ўступленне ў NATO ў траўні 2022 года. Фінляндыя зрабілася чальцом Альянсу 4 красавіка 2023 года. Уступленню Швецыі пярэчылі Турцыя і Вугоршчына, таму краіна далучылася да абʼяднання значна пазней.
Арсен Рудэнка belsat.eu
