11 студзеня выйшаў на волю палітвязень з Горадні Васіль Пілец, які адбываў пакаранне ў папраўчай установе адкрытага тыпу ў Ваўкавыску (ПУАТ №29). Пра ягонае вызваленне паведаміў праваабарончы цэнтр «Вясна».
Васіль Пілец адбыў на «хіміі» роўна 300 дзён. Мужчына быў затрыманы 10 траўня 2021 году і абвінавачаны ў хуліганстве (арт. 339 КК). Васілю інкрымінавалі тое, што ён у снежні 2020 году нібыта штурхаў актывістаў пралукашэнкаўскага руху «Антывандал», якія замазвалі фарбай выяву бел-чырвона-белага сцягу на сцяне. Прычыніў ім праз гэта фізічны боль.
12 лютага 2021 году суд Кастрычніцкага раёну Горадні прызнаў Пільца вінаватым і асудзіў на адзін год «хатняй хіміі». Пілец адмовіўся на судзе ад апошняга слова.
Пазней пракурор падаў пратэст на прысуд – і вырак змянілі на адзін год абмежавання волі з накіраваннем у ПУАТ. Мужчына адбываў тэрмін на ваўкавыскай «хіміі».
Таксама стала вядома, што 11 студзеня са шклоўскай калоніі вызваліўся палітвязень Ілля Лабацэвіч з Наваполацку, асуджаны на паўтара года калоніі за гвалт у дачыненні супрацоўніка ўнутраных спраў (арт. 364 КК).
Ілля Лабацэвіч — стрыечны брат палітзняволенага анархіста Аляксандра Францкевіча.
ЗК belsat.eu