У Беларусі пратэсты супраць гвалту і фальсіфікацыяў працягваюцца ўжо 106 дзён. «Белсат» падводзіць вынікі гэтага дня.
22 лістапада ў Менску адбыўся Марш супраць фашызму. 15-ы нядзельны пратэст быў адметны тым, што праходзіў у новым – лакальным – фармаце. Людзі адмовіліся ад адзінай арганізаванай калоны ў цэнтры Менску. Замест гэтага яны збіраліся па ўсёй сталіцы ў сваіх дварах і мікрараёнах. Абвесцілі 60 кропак збору.
На акцыю выйшлі тысячы асобаў у розных месцах сталіцы. У некаторых раёнах колькасць пратэстоўцаў перавышала тысячу. Акцыі таксама адбыліся ў абласных цэнтрах ды іншых беларускіх гарадах.
Як штонядзелю, перад пратэстам аператары мабільнае сувязі праз патрабаванне дзяржаўных органаў абмежавалі доступ да інтэрнэту. Доступ з’явіўся пасля акцыі, каля 16-й гадзіны. З мэтаю «бяспекі пасажыраў» метрапалітэн зачыніў 10 станцыяў. Таксама менскія ўлады моцна абмежавалі рух грамадскага транспарту на праспекце Незалежнасці, а сілавікі перакрывалі дарогі ў раёнах.
Жыхары мікрараёнаў выходзілі ў двары дзецьмі ды сабакамі, нацыянальнаю сімволікаю і плакатамі, скандавалі лозунгі – напрыклад, «Глядзі ў вакно, а не ў тэлевізар!». Частка пратэстоўцаў збіралася не ў дварах, а на дарозе, часам выходзячы на праезную частку. На акцыю пратэсту выйшлі Курасоўшчына, Пятроўшчына, Лагойскі тракт, Новая Баравая ды іншыя.
Сілавікі кропкава ладзілі разгоны і хапуны, ужываючы спецсродкі ў шмат якіх раёнах: гучныя выбухі святлошумавых гранат было чуваць каля станцыі метро «Каменная горка», у Малінаўцы, на праспекце Дзяржынскага; стрэлы чулі ў Масюкоўшчыне і на праспекце Любімава. Аднак людзі не паддаваліся на правакацыі, не адказвалі агрэсіяй на стрэлы і петарды, захоўваючы спакой. У МУС пацвердзілі ўжыванне спецсродкаў «у дачыненні да грамадзянаў, якія парушалі грамадскі парадак у Менску і аказвалі супраціў супрацоўнікам правапарадку».
Затрыманні прайшлі ў асноўным у Менску, а таксама Бараўлянах, Пінску, Берасці, Наваполацку, Заслаўі, Горадні, Ляхавічах. У Лебядзіным сілавікі хапалі мужчын на вачах у дзяцей.
Праваабарончы цэнтр «Вясна» апублікаваў спіс з прозвішчамі затрыманых, што абнаўляецца і дапаўняецца. Цяпер у іх – больш за 300 прозвішчаў. А тым часам менскі ГУУС пацвердзіў затрыманне больш за 200 асобаў «за парушэнне заканадаўства». Вядома пра 6 асобаў, якіх пасля разгону забралі з РУУСаў на скорых. Сярод затрыманых – мультыінструменталіст гурта «Аддис-Абеба» Цімур Рэйзіс і саліст гурта «Петля Пристрастия» Ілля Чарапко-Самахвалаў. Яго забралі ў Партызанскі РУУС.
Сёння пасля 7 содняў адміністрацыйнага арышту на свабоду не выйшла яшчэ адна нашая калега – аператарка «Белсату» Дар’я Чульцова. 15 лістапада яна вяла разам з Кацярынай Андрэевай стрым з Плошчы перамен. Сілавікі ўварваліся ў кватэру, дзе працавалі журналісткі, разам затрымалі і ў адзін дзень судзілі. У чым вінавацяць Дар’ю, невядома, бо ейны адвакат даў распіску аб неразгалошванні. Магчыма, да яе ўжылі той самы артыкул, што і да Кацярыны – ч. 1 арт. 342 КК «Арганізацыя і падрыхтаванне дзеянняў, якія груба парушаюць грамадскі парадак».
Дар’і Чульцовай і Кацярыне Андрэевай пагражае да трох гадоў зняволення толькі за тое, што яны сумленна выконвалі сваю працу.
У Менскай дзіцячай інфекцыйнай больніцы застаюцца 8 дзяцей, якія былі шпіталізаваныя 20 лістапада з сярэдняй школы №61.
Новых пацыентаў з ліку школьнікаў не паступала. 22 лістапада да выпіскі рыхтуюцца 3 асобы. Крыніцу магчымага заражэння высвятляюць лекары Менскага гарадскога цэнтру гігіены. Створана спецыяльная камісія, якая высвятляе прычыны таго, што адбылося.
За апошнія суткі ў Беларусі афіцыйна зарэгістравана 1564 новыя выпадкі інфекцыі COVID-19. Памерлі 7 чалавек.
Агульная колькасць пацверджаных выпадкаў каронавірусу дасягнула 123 999, памерлых – 1096 чалавек. Пераадолець хваробу за ўвесь час пандэміі здолелі 102 113 асобаў. На ўсёй тэрыторыі Беларусі цяпер дзейнічае абавязковы масачны рэжым.