Не ўвесь арабскі свет гатовы падтрымаць, а тым больш умешвацца ў вайну, якую 7 кастрычніка пачалі ўлады палестынскага сектару Газа супраць Ізраілю.
Як піша выданне Axios са спасылкай на дзве дасведчаныя крыніцы, Аб’яднаныя Арабскія Эміраты папярэдзілі сірыйскі рэжым Башара Асада, каб той не ўмешваўся ў вайну Ізраілю з «Хамасам» і не дапускаў нападаў на Ізраіль з сірыйскай тэрыторыі. Адзначаецца, што эмірацкі бок накіраваў свае пасланні высокапастаўленым сірыйскім чыноўнікам, а таксама праінфармаваў адміністрацыю ЗША пра кантакты з сірыйцамі.
Axios падкрэслівае, што ААЭ маюць большы ўплыў на сірыйскі ўрад, чым большасць арабскіх краін рэгіёну. Але таксама яны падтрымліваюць цесныя стасункі з Ізраілем.
Раней МЗС ААЭ асудзіў напады «Хамасу» на Ізраілю. Там заявілі, што былі шакаваныя паведамленнямі пра атакі на цывільных ізраільцянаў.
Тым часам арабскія хрысціянскія партыі заклікаюць «Хізбулу» не ўцягваць Ліван у вайну.
«Тое, што адбываецца ў Газе, павінна застацца ў Газе», – заявіў прэс-сакратар Ліванскіх сілаў, найбуйнейшай партыі апанентаў «Хізбулы».
Спікер партыі «Катаіб» таксама перасцярог ад эскалацыяў, якія могуць уцягнуць Ліван у вайну.
Нават лідар саюзнага «Хізбуле» хрысціянскага Свабоднага патрыятычнага руху Джыбран Басыль замест таго, каб «пакласці канец ізраільскаму ўтварэнню», заклікаў заняцца «будаўніцтвам ліванскай дзяржавы».
Між тым Расея рыхтуе візіт у Маскву прэзідэнта Палестыны Махмуда Абаса. Сама дамоўленасць пра яго ўжо дасягнутая. Абас узначальвае партыю «Фатх», якая канкуруе з «Хамасам», але разам з тым ён не мае ўлады над сектарам Газа.
Тэрарысты групоўкі «Хамас» з сектару Газа 7 кастрычніка пачалі маштабны напад на Ізраіль, у выніку краіна перайшла ў стан вайны. Ізраіль абвясціў аб аднаўленні кантролю над усімі паселішчамі каля Газы, аднак баі працягваюцца.
Паводле звестак на вечар 9 кастрычніка, у выніку нападу «Хамасу» на Ізраіль загінулі больш як 900 ізраільцянаў і замежных грамадзянаў. Сама меней 2616 чалавек атрымалі раненні. У сектары Газа тым часам загінулі 687 палестынцаў і яшчэ 3800 атрымалі раненні. Таксама паведамляецца, што 17 палестынцаў, у тым ліку чацвёра дзяцей, загінулі ў выніку дзеянняў ізраільскай арміі на Заходнім беразе ракі Іярдан, 295 атрымалі раненні. Ізраільскія вайскоўцы заяўляюць, што знішчылі 1500 палестынскіх баевікоў.
Якуб Хруст belsat.eu