Паводкі ў Грэцыі, Турцыі ды Балгарыі і ракетны абстрэл Украіны. Галоўныя падзеі тыдня ў здымках

Разбураны мост у затопленым раёне грэцкага гораду Кардыца (Karditsa). Моцныя паводкі, выкліканыя бесперапыннымі залевамі ў Грэцыі, Турцыі і Балгарыі, агулам забралі жыцці як мінімум 14 чалавек. Кардыца, Грэцыя.

Парамедыкі рыхтуюць параненага мужчыну да транспартавання машынаю хуткай дапамогі пасля артылерыйскага абстрэлу харчовага рынку ў Касцянтынаўцы. У выніку расейскага ракетнага ўдару загінулі 17 чалавек, у тым ліку дзіця, і яшчэ 32 атрымалі раненні. Касцянтынаўка, Данецкая вобласць, Украіна.

Мужчыны спрабуюць выцягнуць машыну з вады ў кемпінгу Арапя на балгарскім узбярэжжы Чорнага мора. Залевы і навальніцы з канца 4 верасня прывялі да разліву рэк і пашкоджання мастоў у акрузе. Паводле метэаролагаў, колькасць ападкаў, якія выпалі ў Балгарыі за содні, утрая перавысіла месячную норму. Арапя, Балгарыя.

Вайсковец 3-й асобнай дэсантна-штурмавой брыгады ЗСУ надае першую дапамогу параненаму таварышу з пазыўным Полымя, недзе каля Бахмуту, Данецкая вобласць, Украіна.

Калона транспарту, бачная з космасу, выязджае з арт-фестывалю «Burning Man». Залевы ў штаце Нєвада прывялі да таго, што намётавы лагер у пустэльні Блэк-Рок (Black Rock), дзе штогод адбываецца імпрэза, захрас у гразі. Больш за 73 тысячы чалавек аказаліся заблакаваныя ў пустэльні амаль на содні. Блэк-Рок, штат Нэвада, ЗША.

Мусульманскія вернікі збіраюцца ўвайсці ў пячору Хіра на вяршыні ​​гары Джабаль-ан-Нур (Jabal al-Noor), таксама вядомай як Гара Святла, у святым для мусульманаў горадзе Мекка. Згодна з хадытам (паданнем пра словы і дзеянні Мухамэда), прарок правёў у гэтай пячоры 40 дзён перад спасланнем Карану. Мекка, Саудаўская Аравія.

Узброеныя салдаты ахоўваюць шасцярых жаўнераў, якіх абвінавацілі ў злачынствах супраць чалавецтва і парушэнні загадаў, пасля слуханняў у ваенным судзе ў Гоме (Goma). Шасцёра вайскоўцаў, у тым ліку два афіцэры элітнай Рэспубліканскай гвардыі, паўсталі перад ваенным трыбуналам за забойства амаль 50 чалавек падчас разгону пратэсту супраць міратворцаў ААН. Гома, Дэмакратычная Рэспубліка Конга.

Метэаролаг Лёран Муле запускае метэазонд, які вымярае нулявую ізатэрму (таксама завецца ўзроўнем замарожвання) на станцыі «MeteoSwiss» у швейцарскай камуне Паерн (Payerne). Падчас летняй спякоты ў Еўропе быў усталяваны новы рэкорд нулявой ізатэрмы на вышыні 5298 метраў над узроўнем мора, «што ёсць рэкордам з пачатку маніторынгу ў 1954 годзе». Ізатэрма адыгрывае ключавую ролю ў прагназаванні надворʼя ў паўсядзённым жыцці ў альпійскім рэгіёне. Паерн, Швейцарыя.