Мастак Максім Восіпаў зрабіў дывановы рымейк на карціну Барыса Казакова «Снежань» – «са знаёмым з маленства сюжэтам драматычнага забойства і смалення вепрука на Каляды».
Мастак піша, што пачаў працаваць над дываном напярэдадні 24 лютага, пасля на 1,5 месяца той быў закінуты і нарэшце скончаны:
«Паспрабуйце ўявіць:
Пракляты беларускі фаталізм.
Абыякавасць, памяркоўнасць і хатаскрайнасць.
Болькі, шнары і траўмы, якія мы так любім расчэсваць да крыві.
Цяжкі досвед, які мы з гонарам носім на сабе, як тое непрыгожае дзіцё катлету на шыі, каб з ім сябравалі хаця б сабакі.
Упартае пачуванне сябе абʼектам, а не субʼектам у агульнай прасторы.
Засяроджанасць на захаванні культуры, а не на яе развіцці насуперак усяму.
І нават я*учы кончаны русский мир.
Усё гэта – туша ўзгадаванага намі шматгаловага монстра, які рохкае ў пуні, патрабуючы пільнай увагі, шмат ежы і іншага клопату. З ім немагчыма змагацца – ён больш важкі. Ад яго немагчыма збегчы – ён будзе побач, бо вы – яго гаспадар. На яго немагчыма забыцца – ён заўсёды пра сябе нагадае.
Таму самы час падзяліць монстра на шынку і карэйку, грудзінку і кумпячок, галяшку і рульку. І паглынуць, ператварыўшы яго бялкі, тлушчы і вугляводы ў чыстую карысную энергію. Прынамсі аж пакуль ён не паглынуў нас».
Марыя Мурашка belsat.eu