«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі па стане на вечар 10 чэрвеня чытайце ў нашым аглядзе.
У новай справаздачы ўпраўлення вярхоўнага камісара ААН па правах чалавека паведамляецца, што з 24 лютага ва Украіне загінулі 4302 мірныя жыхары. Сярод загінулых – 272 дзіця. Адзначаецца, што большая частка смерцяў выкліканая дзеяннем цяжкай артылерыі і сістэмаў залпавага агню. Пры гэтым рэальная колькасць загінулых можа быць значна большай, паколькі звесткі з месцаў, дзе працягваюцца баі, прыходзяць са спазненнем.
Паводле звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 31900 чалавек забітымі.
Разам з тым выданне The Guardian са спасылкай на свае крыніцы ацаніла страты расейцаў у 20 тысяч чалавек.
Таксама стала вядома, што праз страты, атрыманыя ў баях супраць украінскіх сілаў у Харкаўскай вобласці, мотастралковае падраздзяленне 1-га армейскага корпуса ў поўным складзе адмовілася ад удзелу ў баявых дзеяннях. Адзначаецца, што такая сітуацыя асабліва ўласцівая для астатніх падраздзяленняў, якія сфармаваныя шляхам прымусовай мабілізацыі на часова акупаваных тэрыторыях Данецкай і Луганскай вобласці.
Дарадца кіраўніка офісу прэзідэнта Украіны Міхайла Падаляк паведаміў, што страты ЗСУ падчас поўнамаштабнай вайны з Расеяй складаюць прыкладна 100–200 вайскоўцаў за содні. Адна з галоўных прычынаў вялікіх стратаў – адсутнасць парытэту паміж украінскімі і расейскімі вайсковымі магчымасцямі. Палітык адзначыў, што Украіна мае патрэбу ў 300 ракетных сістэмах, каб дасягнуць парытэту з агнявою магутнасцю Расеі і вызваліць акупаваную тэрыторыю.
Таксама Падаляк заявіў, што пакуль Расея не пацярпіць сур’ёзнай ваеннай паразы, ніякая форма дыялогу не будзе магчымая.
Цягам апошніх содняў на Данецкім і Луганскім напрамках украінскія сілы адбілі сем атак расейцаў. Паведамляецца, што расейцы па-ранейшаму намагаюцца ўсталяваць поўны кантроль над Севераданецкам, баявыя дзеянні ў горадзе працягваюцца.
За межамі Усходняй зоны аперацыі расейцы ў асноўным умацоўваць свае пазіцыі ды праводзілі ратацыю сярод асабовага складу. На Паўднёвабужскім кірунку ўкраінскія сілы праводзяць наступальныя дзеянні, расейцы спрабуюць абараняцца. Пры гэтым працягваюцца абстрэлы расейскай артылерыяй і авіяцыяй украінскіх сілаў па ўсёй лініі сутыкнення.
Прэзідэнт Францыі Эманюэль Макрон правёў тэлефонныя перамовы з украінскім калегам. Паведамляецца, што Макрон спытаў Зяленскага аб патрэбах у ваеннай тэхніцы, палітычным і фінансавым падтрыманні і гуманітарнай дапамозе. Таксама прэзідэнт Францыі заявіў пра гатовасць перадаць Украіне больш цяжкае ўзбраенне.
У той жа час Мінабароны Чарнагорыі прапанавала ўраду краіны прыняць рашэнне аб наданні Украіне дадатковай ваеннай дапамогі. Урад адрэагаваў станоўча. Бліжэйшым часам патрэбы будуць разгледжаныя супольна з украінскім бокам і партнёрамі для надання неабходнай фінансавай, гуманітарнай і ваеннай дапамогі.
Намеснік міністра аграрнай палітыкі і харчавання Украіны Тарас Высоцкі заявіў, што наступны ўраджай ва Украіне можа знізіцца на 35-40%, паколькі ў выніку расейскага ўварвання Украіна страціла 25% раллі. Таксама намеснік міністра дадаў, што Расея скрала з часова акупаваных тэрыторый каля 500 тысяч тон збожжа.
Віцька Кавалак belsat.eu
