Прэзідэнт Польшчы Анджэй Дуда: Мы вельмі хочам, каб Беларусь рухалася да дэмакратыі
Мы вельмі хацелі б, каб Беларусь рухалася да дэмакратыі, стала цалкам суверэннай і незалежнай краінай, заявіў прэзідэнт Польшчы Анджэй Дуда ў Бухарэсце. Ён таксама звярнуў увагу на рэпрэсіі, з якія ладзіць беларускі рэжым супраць польскай меншасці. Прэзідэнты Польшчы і Румыніі таксама абмеркавалі пытанні бяспекі Украіны і еўрапейскіх памкненняў Малдовы.
Анджэй Дуда падчас супольнай прэс-канферэнцыі з прэзідэнтам Румыніі Клаўсам Ёганісам заявіў, што адной з тэмаў перамоваў з’яўляецца сітуацыя ў Беларусі.
Дуда звярнуў увагу на рэпрэсіі, з якімі сутыкнуліся беларускія грамадзяне польскай нацыянальнасці з боку беларускага рэжыму, а ў прыватнасці на арышт лідараў польскай меншасці. «Сітуацыя ў гэтым плане вельмі складаная», – устрывожана сказаў прэзідэнт Польшчы.
«Мы вельмі хацелі б, каб гэтая краіна рухалася да дэмакратыі, каб гэтая краіна стала сапраўды цалкам суверэннай і незалежнай краінай. Мы хацелі б, каб амбіцыі і памкненні беларускага народу і ўсіх грамадзянаў Беларусі былі рэалізаваныя», – падкрэсліў Анджэй Дуда.
«Мы павінныя быць вельмі пільнымі, па-першае, назіраючы за сітуацыяй, а па-другое, быць у рэжыме гатовасці ў выпадку якой-кольвек пагрозы з таго боку, а таксама і на міжнародным форуме, які ў цэлым стане на абарону Беларусь, каб захаваць яе суверэнітэт», – падкрэсліў прэзідэнт Польшчы.
Тэмай сустрэчы Ёганіса і Дуды было таксама пытанне Украіны, у тым ліку – як сказаў польскі прэзідэнт – «праблема, якая на гэты момант меншая, але сапраўды значная яшчэ два тыдні таму, – перадыслакацыя расейскіх войскаў у бок украінскай мяжы, небяспека магчымага далейшага ўварвання ва Украіну».
Польскі прэзідэнт таксама адзначыў, што пагроза расейскага ўварвання «адступіла, калі расейскія часткі вярнуліся на свае базы». Ён падкрэсліў, што, нягледзячы на гэта, сітуацыя там цяпер вельмі складаная, і што Крым, Данецкі і Луганскі раёны з’яўляюцца акупаванымі тэрыторыямі.
«Ні Еўропа, ні краіны свету не могуць пакідаць без увагі гэтую частку нашага кантыненту. Абсалютна мы ўсе павінныя выступаць за Украіну з аднаго боку, але пры гэтым мы таксама павінны дбаць і пра сваю бяспеку», – сказаў Дуда.
Польскі прэзідэнт выказаў перакананне, што гэта будзе важнай тэмай перамоў на чэрвеньскім саміце NATO у Бруселі, а таксама падчас саміту ў Бухарэсце ў панядзелак у другой палове дня. Ён выказаў задавальненне тым, што ў гэтай сустрэчы прымуць удзел прэзідэнт ЗША і кіраўнік NATO. Паводле яго ацэнкі, гэта сведчыць пра важнасць саміту вялікай дзявяткі і еўраатлантычнай згуртаванасці.
Дуда падкрэсліў, што «стала вельмі добрай і праверанай традыцыяй», што нашая частка Еўропы, «якая мае ў межах NATO свае ўмовы, патрэбы і погляды, звязаныя з бяспекай», сустракаецца і дыскутуе перад сустрэчамі ўсяго Паўночнаатлантычнага альянсу, каб каб мець магчымасць агучыць сваю перспектыву і патрэбы. Як ён адзначыў, гэтак было, у прыватнасці, напярэдадні саміту NATO у Варшаве ў 2016 годзе.
Прэзідэнт Анджэй Дуда звярнуў увагу на тое, што ў выніку варшаўскага саміту Альянсу цяпер ва ўсходняй частцы Еўропы ёсць прысутнасць NATO.
«На нашай тэрыторыі ёсць саюзныя сілы, якія ў значнай ступені гарантуюць нашую бяспеку, і мы можам спакойна праводзіць мадэрнізацыю і развіццё ўласных узброеных сілаў», – падкрэсліў ён.
Дуда паведаміў, што размова з прэзідэнтам Румыніі датычылася і стасункаў Малдовы з Еўрапейскім звязам. Ён заявіў, што Польшча падтрымлівае «імкненне малдаўскага народа, усіх грамадзян Малдовы, стаць часткай Еўрапейскага звязу, рухацца на Захад».
belsat.eu паводле PAP
